Гадаадын иргэд манай улсад чөлөөтэй зорчиж, аялж бизнес эрхэлж байна. Ийм эрхийг тэдэнд хуулиар олгож, элдэв хөнгөлөлт эдлүүлдэг. Дотоодын иргэддээ эдлүүлдэггүй зарим хөнгөлөлтийг гадаадынханд олгож, харийн хүн бүрийг хаан гэх нь холгүй хүлээж авдагаас тэд улам даврах боллоо. Ийн даврагсдын нэг хаягдал төмөр боловсруулах үйлдвэрийнхэн. Гадаадын иргэний эрх зүйн байдлын тухай хуульд “Гадаадын иргэн Монгол Улсын хууль тогтоомж болон олон улсын гэрээгээр тодорхойлогдсон эрх чөлөөг Монгол улсын эрх ашиг, тус улсын иргэний болон бусад хүний эрх, хууль ёсны ашиг сонирхолд харшаар эдэлж болохгүй” гэж заасан. Энэ заалтыг гадаадын иргэд зөрчсөөр байгаа тухай баримт өгүүлэе. БНХАУ –ын хөрөнгө оруулалттай “Ши Фа”, ”Шин гү яан” үйлдвэр нийслэлийн засаг даргын захирамжыг үл тоомсорлон, дулааны 2-р цахилгаан станцын ард үйл ажиллагаа явуулсаар байсныг цагдаа, тагнуул, мэргэжлийн хяналтынхан хамтран шалгаж арга хэмжээ авчээ.
Нйислэлийн төвлөрсөн суурин газарт барилгын арматур , ган бөмбөлөг ширмэн болон хөнгөн цагаан хийц үйлдвэрлэхийг хориглож, төмрийн үйлдвэрүүдийг нүүлгэх тухай нислэлийн засаг даргын захирамж гараад хоёр дахь жилтэйгээ золгох гэж байна. Байгаль орчны сайд бүр хоёр жилийн өмнө ийм тушаал гаргасан. Төмрийн үйлдвэрүүд аюул тарьж байгааг Улсын болон Нийслэлийн мэргэжлийн хяналтын газраас удаа дараа шалгаж тогтоосон. Энэ дагуу нийслэлийн Засаг даргын зөвлөлийн хуралдаанаас дээрхи шийдвэрийг гаргасан. Гэсэн ч төмрийн зарим үйлдвэр уг шийдвэрийг биелүүлээгүй. Налайх, багануур дүүрэг зааж өгсөн газар руу нүүгээгүй төмрийн үйлдвэрийн том толгойтой эздийг мэргэжлийн хяналтынхан яахаа мэдэхгүй байгаад тагнуул, цагдаагийн газраас тусламж авчээ. Одоо тэднийг албадан гаргахаас өөр аргагүй болоод байгаа. Байгаль орчны сайд, нийслэлийн засаг дарга ч гаргасэн шийдвэрээ хэрэгжүүлэхэд анхаарсангүй. Нийслэлийн засаг даргын захирамж гараад таван сар болж байхад  “Ши Фа”  үйлдвэрт дэлбэрэлт болж, хүний амь эрсэдсэн. Үүний дараа цагдаа, онцгой байдал, тагнуулынхан сандралдан, төмрийн үйлдвэрийг шалгаж бөөн юм болсон. Гэсэн өнөөг хүртэл хүчрээгүй л байна. “Хос чандмань” үйлдвэрийн менежер нь Нийслэлийн захирагчийн ажлын албаны үйлдвэрлэл, үйлчилгээний хэлтсийн ахлах мэргэжилтнийг “Та нар анхнаасаа яах гэж нийслэлдээ төмрийн үйлдвэр оруулсан юм вэ” гэж загнаж байв. Энэ нь ч ортой. Эхнээс нь тэднийг хамжааргатай байлгасан бол гаргасан шийдвэрээ даруй хэрэгжүүлдэгсэн бол харийхан ингэж даварч хоёр үйлдвэрийг нүүлгэхийн тулд цагдаа, тагнуулынхантайгаа хүч хавсрахад хүрнэ гэж үү. Дулааны 2-р станцын инженер нь “Ши Фа”, ”Шин гү яан” үйлдвэрүүдийг дур мэдэн цахилгаанаар хангасан юм. Дээрх үйлдвэрийн эзэд саяхан мэргэжлийн хяналтын байцаагчид хахууль өгөх гэж оролджээ. Харийхан Монголын төр , төрийн албан хаагчийг халаасандаа багтаан гэж бодож байгаагийн илрэл энэ. 2005- оны дундуур Улаанбаатарт төмрийн найман үйлдвэр ажиллаж байв. Харин тухайн оны сүүлчээс 2006 он хүртэл ганцхан жилийн дотор 410 гаруй болж, борооны дараах үүл шиг олширчээ. Энэ нь урд хөршийн төмрийн үйлдвэрийн талаар явуулж байгаа бодлого, арга хэмжээтэй холбоотой хэмээн мэргэжилтэнүүд тайлбарлав.