"40 мянган айлын орон сууц хөтөлбөр"-ийн хүрээнд яригдаж байсан томоохон төслийн нэг бол түрээсийн орон сууц. Жил бүр зээлийн тодорхой хувийг банкинд төлөх боломжтой хүмүүс нь орон сууцанд хамрагдчихдаг юм байж. Харин энэхүү зээлийг төлөх чадваргүй, санхүүгийн боломж муутай өрхүүд эргээд л гэр хороололдоо үлдэнэ гэсэн үг. Чухамдаа хөнжлийнхөө хэрээр хөлөө жийхийн үлгэрээр сачийтай нь орон сууцанд хамрагдаж, гар хоосон нь гэр хорооллыг хөгжүүлэх үйлсэд хувь нэмрээ оруулах нь. Уг нь түрээсийн орон сууцны тухай нэг удаа сураг дуулдаад тасарсан.

Өнгөрсөн гуравдугаар сард зохиогдсон "Улаанбаатар хотын хот байгуулалт, төлөвлөлтийн  өнөөгийн байдал, тулгамдаж буй зарим асуудлыг шийдвэрлэх арга зам" семинарын үеэр Орон сууцны санхүүжилтийн корпорацийн захирал Ж.Жаргалсайхан энэ тухай цухасхан дурдсан. Түүний хэлснээр бол түрээсийн орон сууцны хөрөнгө оруулалт, эрх зүйн орчныг нь зохицуулан шийдвэрлэчихвэл 2009 он гэхэд 5050 түрээсийн орон сууц ашиглалтад орно гэж байсан. Энэ нь орон сууц худалдан авах чадваргүй иргэдэд тодорхой хугацаагаар түрээсийн орон сууц эзэмшүүлэх юм.

Мэдээж түрээсийн үнэ зах зээлийн ханшаас хямд байх учиртай. Энэ туршлагыг манай улсад нэвтрүүлэхийн тулд түрээсийн орон сууцны тухай хууль эрх зүйн орчныг тодорхой болгох шаардлагатай нь дамжиггүй. Гэвч түрээсийн орон сууцны тухай яриа одоо огт дурсагдахаа байжээ. Уг нь хэрэгжүүлчихвэл болохгүй гэх зүйлгүй сэн.

"40 мянган айлын орон сууцны хөтөлбөр"-өө хэрэгжүүлэхэд шаардлагатай хөрөнгийн эх үүсвэрээ бэлэн болгох гэж мэргэжлийн хүмүүс өнөөг хүртэл явна. Хэрэв хөрөнгө, мөнгөний асуудлыг цаг тухайд нь шийдвэрлэчихсэн бол Засгийн газрын орон сууцны хөтөлбөр эхлэх хугацаа байсан.