Монгол Улсын Засгийн газрын 2002 оны 28 дугаар тогтоол, Монгол Улсын "Засаг захиргаа, нутаг дэвсгэрийн нэгж, түүний удирдлагын тухай" хуулийн 29 дүгээр зүйлийн 29.2, 29.1.3-ын "н", 30 дугаар зүйлийн 30.1.5, Нийслэлийн эрх зүйн байдлын тухай хуулийн 8 дугаар зүйлийн 3 дугаар заалт, Байгаль орчныг хамгаалах тухай хуулийн 16 дугаар зүйлийн 2.4 дүгээр заалтыг үндэслэн ЗАХИРАМЖЛАХ нь:

Нэг. Нийслэлийн Засаг даргын үйл ажиллагааны хөтөлбөр, Нийслэл Улаанбаатар хотыг 2020 он хүртэл хөгжүүлэх ерөнхий төлөвлөгөөг хэрэгжүүлэх ажлын хүрээнд суурьшлын бүсэд байгалийн түгээмэл тархацтай ашигт малтмалын хайгуулын болон ашиглалтын үйл ажиллагаа явуулж байгаа тусгай зөвшөөрөл бүхий байгууллагуудын үйл ажиллагаа, Туул голын сав дагуух газрын ашиглалт, нөхөн сэргээлтийн талаар Улсын Мэргэжлийн хяналтын газрын даргын зөвлөлийн 2006 оны 4 дүгээр сарын 6-ны өдрийн хуралданы шийдвэр дүгнэлтийг үндэслэн нэгдүгээр хавсралтанд дурьдсан аж ахуйн нэгж байгууллагуудын ашиглалтын тусгай зөвшөөрлийг түдгэлзүүлж хүчингүй болгох асуудлыг Ашигт малтмал, газрын тосгоны хэрэг эрхлэх газарт тавьж шийдвэрлүүлэхийг /Нийслэлийн Газрын алба Б.Төмөрхуяг/-т даалгасугай.

Хоёр. Элс хайрга, шавар зэрэг барилгын материалын орд газрыг байгалийн тогтоогдсон нөөц, ашиглалтын одоогийн байдалтай уялдуулан Налайх дүүргийн Элстэйн гол /Зуунмод/-ын урьд тогтоогдсон нөөц бүхий талбайд элс, Хан-Уул дүүргийн нутаг дэвсгэр дэх Таван толгой /Гишүүний ам/-д тогтоогдсон нөөц бүхий газарт хайрга, дайрга, Сонгинохайрхан дүүргийн нутаг дэвсгэр Баянхошууны Найрамдал ордод шавар авч ашиглахаар тус тус төвлөрүүлэн байршуулж, хавсралт зургийн дагуу баталсугай.

Гурав. Дээрхи асуудлуудыг Германы Техник Хамтын Ажиллагааны Нийгэмлэгийн тусламжтай хийгдэж буй "Монгол улсын барилгын материалын үйлдвэрийн мастер төлөвлөгөө"-нд тусгуулахыг Нийслэлийн Засаг даргын Тамгын газрын Хотын хөгжлийн бодлогын хэлтэс /Б.Мөнхбаатар/-т, Улаанбаатар хотын ерөнхий архитектор бөгөөд Барилга, хот байгуулалт, төлөвлөлтийн газрын дарга /Н.Нацагдорж/-д тус тус даалгасугай.

Дөрөв. Барилгын ажил эхлэх зөвшөөрөл олгох болон барилга байгууламжийг ашиглалтанд оруулах үйл ажиллагаанд элс, шавар, хайргыг барилгын материалын төвлөрсөн цэгүүдээс авах тухай холбогдох байгууллагуудтай байгуулсан гэрээ, тээвэрлэлтийн тоо хэмжээг тооцон үзэж байхыг Нийслэлийн Барилга, хот байгуулалт, төлөвлөлтийн газар / Н.Нацагдорж/, Нийслэлийн мэргэжлийн хяналтын газар /Г.Галсанпунцаг/-т тус тус үүрэг болгосугай.

Тав. Улаанбаатар хотын нутаг дэвсгэрт тусгай зөвшөөрөлгүйгээр хайрга бутлан ангилах үйл ажиллагаа эрхэлж буй аж ахуйн нэгж байгууллагуудын газар ашиглалтын байдалд шалгалт хийж, 2007 оны 9 дүгээр сард багтаан газар ашиглах эрхийг хүчингүй болгох арга хэмжээ авч ажиллахыг Нийслэлийн Газрын алба /Б.Төмөрхуяг/, Нийслэлийн мэргэжлийн хяналтын газар /Г.Галсанпунцаг/-т тус тус үүрэг болгосугай.

Зургаа. Зөвшөөрөлгүй элс, хайрга, шавар олзворлож байгаа иргэн, аж ахуйн нэгж, байгууллагын буруутай үйл ажиллагааг таслан зогсоох, холбогдох хууль журмын дагуу шийдвэртэй арга хэмжээ авах, энэ ажиллагаанд олон нийтийг татан оролцуулах, удаа дараа давтан зөрчил гаргаж буй этгээдийн бизнесийн эрх чөлөөнд халдах зэрэг дорвитой арга хэмжээнүүдийг авч хэрэгжүүлэхийг Нийслэлийн Цагдаагийн газар / Ц.Бумнанжид/, Нийслэлийн мэргэжлийн хяналтын газар /Г.Галсанпунцаг/, Нийслэлийн Байгаль хамгаалах газар /Г.Бүдрагчаа/, Нийслэлийн газрын алба /Б.Төмөрхуяг/, Улаанбаатар хотын ерөнхий менежер /Г.Мөнхбаяр/ нарт тус тус даалгасугай.

Долоо. Энэхүү тушаал, захирамжийн биелэлтэнд хяналт тавьж, шийдвэрлэвэл зохих асуудлуудыг тухай бүр шуурхай шийдвэрлүүлж ажиллахыг Нийслэлийн газрын алба /Б.Төмөрхуяг/, Нийслэлийн мэргэжлийн хяналтын газар /Г.Галсанпунцаг/, Дүүргүүдийн Засаг дарга, Улаанбаатар хотын ерөнхий менежер /Г.Мөнхбаяр/ нарт тус тус даалгасугай.