Бидний аж амьдрал өдөр өдрөөр өөрчлөгдсөөр, ахуйд маань шинэ зүйл нэвтэрсээр байна. Ялангуяа орон сууц барих, засварлах, орон гэрээ засаж тохижуулах ажил өмнө өмнөхөөс илүү өрнөж байна. Энэ нь сайшаалтай боловч, цаг алдахгүйгээр анхаарахгүй бол болохгүй нэгэн ноцтой зүйл нийгмийг хамарсан уршигт үзэгдлийн хэмжээнд дөхөж очоод байна. Иргэд маань барилгын ажлын мэдлэг, туршлага хомсын улмаас чанарын баталгаагүй, эрүүл мэндийн шаардлага хангахгүй материал их ашиглаж байна.   Бид   "чанарын шаардлага хангахгүй" гэж бишгүй ярьж байна. Одоо, "эрүүл мэндийн шаардлага  хангахгүй" гэж хүчтэй ярихгүй бол болохгүй цаг ирлээ. Чанарын шаардлага хангахгүй байна гэдэгт ихэнх хүн материалын элэгдлийн   талаас   нь бодоод, орчиндоо үзүүлэх нөлөөг нь анхаардаггүй. Орчин үед, ямар нэгэн материалын орчиндоо үзүүлэх  нөлөө,  хүний эрүүл мэндэд үзүүлэх нөлөөг нь эн тэргүүнд анхаарч үздэг   болж байна. Тухайлбал, хүний эрүүл мэнд нэгдүгээрт тавигдана гэсэн үг. Харамсалтай нь, манайд энэ   талын   сэтгэлгээ үнэхээр   хоцрогдонгуй байна. Ерөөсөө л бид өөрсдийн буруугаасаа, өөрөөр хэлбэл, амьдарч байгаа байр маань ямар материалаар хийгдсэн, ямар материалаар засаж янзалсан зэргийг онц ач холбогдолтойд үздэггүйгээсээ болоод, янз бүрийн өвчин тусаж байна. Өвчин хууч гэхээр, юуны өмнө, идэж уух юмнаас л боллоо гэж үздэгээ больцгооё. Түүнээс дутахгүй аюул дотор бид амьдарч байна. Жишээ болгоод, хүмүүсийн түгээмэл  хэрэглэдэг хэдхэн материалын тухайд өгүүлье.

ДСП гэж, барилгын ажилд өргөн хэрэглэдэг хавтан бий. Хятадын үнэ хямд ийм хавтанг Дэнжийн 1000-ын зах, 100 айлын лангуунууд, Нарантуул зах, мөн хятадын бараа материалыг бөөндөж зардаг дэлгүүрүүдэд зарж л байдаг. Энэ хавтангаар сууцаа доторлосон суугчдын нүд хорсох, аргах болон хамрын хөндий загатнах, дотор давчдах зэргээр организмын хэвийн ажиллагаа алдагдаж, ужиг  өвчин   болох нь  цөөнгүй  байна. Ийм  хямд хавтанг хийхдээ, шахалтанд нь стандартын бус цавуу хэрэглэдэг. Гэрийн дулаанд, материалын ууршилт явагддаг учраас ийм хавтангаас хорт хий ялгардаг байна.

Плита
Стандартын шаардлага хангахгүй,   хямд   плитааны найрлагад стандартын бус бодис их хэмжээгээр байдаг, Бүр цацраг идэвхт хий ялгардаг талаар сүүлийн үед их анхааруулж байна. Ийм плитаг, хүн байнга суугаад байдаггүй, зочид буудлын хана зэрэгт их ашигладагийг анхаар.

Лакан будаг.
Ууршимтгай, хүний эрүүл мэндэд маш хортой. Үргүй болгодог гэсэн яриа ч бий. Засварчингууд ийм будагтай их ажилладаг учир хордлого тайлж байна гэж архи ууж харагддаг. Энэ нь аргаа барсан арга. Архи ууснаар биенд нөлөөлөх хор саармагжихгүйг эмч нар анхааруулсаар байна.