“40 мянган айлын орон сууц” хөтөлбөрт зөвхөн төрийн албан хаагч хамрагдана гэсэн яриа гадуур байгаа. Энэ тухай ОССК-ийн хүмүүстэй холбогдож мэдээлэл авсан юм.
Түүний тайлбарласнаар хөтөлбөрт манай улсын төрийн албан хаагч болон бага, дунд орлоготой айлууд хамрагдах аж. Ер нь байр авах гээд мөнгө нь хүрэлцэхгүй байгаа иргэдэд “40 мянган айлын орон сууц” хөтөлбөр боломжийн санал тавьж байгаа юм байна. Энэ тухай дэлгэрэнгүй мэдээллийг дор нийтэллээ.

Нийслэлийн гурван дүүргийн зургаан байрлалд орон сууц баригдана Улаанбаатар хотод энэ жил нийтдээ 560 айлын орон сууц барихаар төлөвлөж байсан хэдий ч санхүүгийн боломж болон барилга барих талбай байхгүйгээс хамааран одоог хүртэл баригдаж эхлээгүй байгаа юм байна. Харин хөдөө, орон нутагт 185 суманд 984 орон сууц барих юм байна. Улаанбаатар хотын гурван дүүргийн зургаан байрлалд барих байрлалыг нэрлэвэл:

Сонгинохайрхан дүүрэг:
-Зургадугаар хороонд нэг байрлал
-Хорьдугаар хороонд хоёр болон зургадугаар хороололд
-21 дүгээр хороололд тус тус баригдах юм байна.

Баянгол дүүрэгт:
-Гуравдугаар хороонд 73 дугаар сургуулийн хажууд

Хан-Уул дүүрэгт:
-10 дугаар хороо буюу нисэхэд
-Хоёрдугаар хороо буюу Яармагт 40000 айлын орон сууцны хөтөлбөрийн барилгууд баригдах юм байна.

40000 айлын орон сууцны 1м квадратын үнэ 350 мянган төгрөгөөс хэтрэхгүй
40000 айлын орон сууцанд орохыг хүсэгчдийн гол анхаарал хандуулж байгаа зүйл бол үнэ. Байрны үнийг м.кв-т нь 350 мянгаас хэтрүүлэхгүй гэж албаны хүмүүс мэдээлж байгаа. Гэхдээ барилгын материалын үнэ өссөн энэ үед энэ үнэндээ яг баригдана гэдэгт захиалагч нар эргэлзэж байгаа ч дээрх үнэнээс хол хэтрүүлэхгүй гэдэгтээ тэд итгэлтэй байгаа юм билээ. Харин хөдөө орон нутгуудад яг төвийн гэсэн ойролцоох хэдэн сумдаар нь дөрөв болон найман айлын орон сууц барьж байгаа юм байна. Нийтдээ энэ жилдээ есөн аймгийн, 29 суманд барилга баригдаж байгаа аж. Тэр оршин суугчид байраа таван сая төгрөгөөр худалдаж авна гэнэ.

Орон сууцны хөтөлбөрт хамрагдахын тулд байнгын орлоготой байх ёстой
Улаанбаатар хотын оршин суугчид хороон дээрээ очиж хүсэлтийн маягтаа бөглөн, хөдөө орон нутагт байгаа иргэд ЗДТГазраараа дамжуулан хүсэлтийн маягтаа бөглөх юм байна. Маягт бөглөхдөө хамгийн гол нь үнэн зөв гаргацтай бичих хэрэгтэй бөгөөд өөрсдийнхөө хувийн дугаараа цээжлээд ОССК-тай холбоо бариад хариугаа авах аж. Ер нь энэ хөтөлбөрт хамрагдахын тулд тухайн айл байнгын санхүүжилттэй байх нь бас нэг чухал үзүүлэлт аж. 40 янган айлын орон сууц хөтөлбөрт төрийн албан хаагч болон бага, дунд орлоготой хүмүүс барьцаа маягаар байрныхаа нэг хувийн урьдчилгаа төлж, 70 хувийг нь ОССК-тай хамтын гэрээ байгуулан орон сууцны зээлд хамрагдаад жилийн 10-11 хувийн хүүгээр 10 жилийн хугацаатайгаар иргэдэд олгогдоно. Хэрвээ хувь хүн өөрөө хүсэх юм бол заавал 10 жилийн хугацаанд төлөх шаардлага байхгүй аж. Энэ 10 жилийн хугацаатай зээлээ одоогийн байдлаар Капитал, Голомт, Улаанбаатар банктай хамтран олгохоор болоод байгаа гэнэ. Харин хөдөө, орон нутгуудад эдгээр гурван банкны салбарууд нь цөөн байдаг учраас Хаан банктай хамтран ажиллахаар ярилцаж байгаа юм байна. Харин үлдсэн 30 хувийг нь хөтөлбөрт хамрагсад төлнө.
40 мянган айлыг орон сууцжуулах хөтөлбөр нь УИХ-ын 69 дүгээр тогтоолын дагуу 60 тэрбум төгрөгийн хөрөнгө оруулахаар шийдэгдсэн аж. Одоогийн байдлаар гүйцэтгэл нь 1,1 тэрбум төгрөг болоод байгаа гэнэ.

Нийслэлд барилгын ажил эхлээгүй байна
ОССК-ийн Инженер техникийн хэлтсийн ларга Ч.Цэдэнбалжир: Санхүүг нь гаргаад өгвөл хэзээч барилгын ажил эхлэхэд бэлэн
Орон сууцуулах хөтөлбөрийн барилгын ажил нь Улаанбаатар хотын хэмжээнд баригдаж эхлээгүй байгаа юм. Энэ талаар бид тодрууллаа.
-Нийслэлд одоо хүртэл 40 мянган айлын орон сууц хөтөлбөрийн барилга баригдаж эхлээгүй байна. Энэ ямар учиртай юм бол оо?
-Манай ОССК нь БХБЯ, Хотын захиргаа, Сангийн яам гэсэн гурван хувь нийлүүлэгчтэй. Тиймдээ ч Сангийн яамнаас журмынхаа дагуу мөнгөн эх үүсвэрээ гаргаж өгөхгүй байна. Дээрээс нь барилгын материалын үнэ ямар байгаа билээ. Бас Улаанбаатар хотод гурван дүүргийн зургаан байрлалд баригдах болохоор нөгөө хүмүүс нь газраа суллаж, нүүж өгөхгүйгээс болж хойшлогдоод байна л даа.
-Газраа суллаж өгөхгүй байгаа иргэдэд албан хуудас ч юм уу шаардах хуудас хүргүүлсэн үү?
-Бид удаа дараалан хүргүүлж байгаа. Бүр “Танайхыг унаа тэргээрээ нүүлгээд байх газар чинь аваачаад өгье” гэсэн боловч тэд “Бид энэ газраасаа нүүхгүй ээ” гээд л байгаад байдаг. Ийм л хүндрэлтэй асуудалтай тулгарчихаад байна.
-Тэгвэл барилгаа өөр газар барьж болохгүй гэж үү?
-Үгүй ээ. Энэ чинь цаанаасаа энэ дүүрэгт энэ газар барина гээд өгсөн болохоор болохгүй шүү дээ.
-Тэд үнэхээр гүрийгээд нүүхгүй бол барилга баригдахгүй гэсэн үг үү?
-Нүүлгэнэ л гэж бодож байгаа. Ямартай ч санхүүгийн асуудал нь ороод ирвэл тэр үед нь яаж ийж байгаад нүүлгэнэ. Гол нь барилгын ажил хойш татаад байгаа зүйл бол хотын захиргаанаасаа шууд хамааралтай байгаа юм.
-Яагаад санхүүжилтыг удаагаад байгаа юм бол?
-Шийдвэрлэх шатандаа орж л байх шиг байна. Тэгэхдээ яг банк руу мөнгө орсон үед л шийдэгдсэн гэж үзнэ болохоос урьдчилаад хэлж чадахгүй байна.
-Хөрөнгө санхүү чинь орж ирвэл хэзээ барилгаа барьж эхлэх вэ?
-Хөрөнгө ороод ирэх л юм бол тендер зарлаад, 30 хоногийн дараагаас барилга эхэлнэ. Ер нь журман дээрээ ч тендер зарласнаас хойш 30 хоногийн дараа барилгын ажлаа эхэлнэ гэсэн байгаа юм.