Мексик улсын нийслэл хот Мехикод Латин Америктаа хамгийн өндөрт тооцогдох Torre Bicentenario хэмээх барилгын угсралтын ажлыг эхлүүлэхээр болжээ. Уг барилгыг 2010 он гэхэд барьж дуусгах бөгөөд 300 метр өндөртэй байх юм байна. Torre Bicentenario хэмээх Испани үгийг орчуулбал “хоёр зуун жил сүндэрлэсэн цамхаг” гэсэн утгатай гэнэ. Мексикийн нэгдсэн улсын тусгаар тогтносны 200 жилийн тэмдэглэлт ойд зориулан Мехико хотын зүүн хойд хэсэгт тус улсын ерөнхийлөгчийн өргөөнөөс холгүйхэн тус цамхагийг барих ажээ.

Уг барилгын гол захиалагч Grupo Danhos төслийг нь Office for Metropolitan Architecture хэмээх зураг төслийн товчоогоор хийлгэсэн нь хоёр пирамидыг залгасан мэт санагдуулам болсон бөгөөд агааржуулалт болон хэсэг тус бүрийн гэрэлтүүлгийг хангах үүрэгтэй хоёр хонгил цамхагийн дагуу байхаар зохиогджээ. Барилгыг офисын зориулалтаар ашиглахын зэргэцээ хурлын танхим, гимнастикийн төв, ресторан байхаар төлөвлөжээ. Нийт ашигтай талбай нь 393 885 м2 байх бол ААА зэрэглэлийн офис 165600 м2, хурлын танхим 3700 м2 талбай эзлэнэ. Цамхагийн өргөн нь суурь болон дээд хэсэгтээ 40 метр ба хамгийн өргөн нь дунд хэсэгтээ 73 метр байх ажээ.