Хүн амыг орон сууцаар хангах "40 мянган айлын орон сууц" хөтөлбөрийг хэрэгжүүлэхэд гүйцэтгэгч байгууллагуудын санхүүжилт, орон сууцтай болохыг хүссэн иргэдэд олон жилийн хугацаатай, хөнгөлөлттэй зээл шаардлагатай байгаа билээ. Орон сууцны санхүүжилтийн корпораци (ОССК), Улаанбаатар хотын банк, Капитал банк хамтран дамжуулан зээлдэх гэрээ байгуулах үйл ажиллагаа өчигдөр "Чингэс" зочид буудалд болов. Дамжуулан зээлдэх гэрээнд Орон сууцны санхүүжилтийн корпорацийн гүйцэтгэх захирал Ж.Жаргалсайхан, Улаанбаатар хотын банкны гүйцэтгэх захирал Ө.Ганзориг, Капитал банкны гүйцэтгэх захирал Д.Ариун-болд нар гарын үсэг зурлаа. "40 мянган айлын орон сууц" хөтөлбөрийг хэрэгжүүлэхэд Засгийн газрын бондын хөренгийн эх үүсвэрээс барилгын ажлын гүйцэтгэлийг нь санхүүжүүлэх болж байгаа юм. Орон сууцны зориулалтаар олгох урт хугацааны зээлийг тодорхой шалгуур үзүүлэлтийг хангасан арил-жааны банкаар дамжуулан иргэдэд зээлдүүлэх, эргэн төлөгдөхтэй холбогдсон харилцааг зохицуулахад гэрээний зорилго оршиж байгаа аж. Дамжуулан зээлдүүлэх гэрээ байгуулсан банкууд 11-ээс илүүгүй хүүтэйгээр мөнгө дамжуулан зээлдүүлэх эрх зүйн орчин бүрдсэнээр иргэд 1-2 өрөө байрны мөнгийг арван жил хүртэлх хугацаанд төлж болох боломж нээгдэж байгаа гэж ОССК-ийн гүйцэтгэх захирал Ж.Жаргалсайхан ярьсан юм. Сангийн яам даруйхан мөнгөний асуудлыг шийдээд өгвөл 2008 оны тавдугаар сар гэхэд 20 гаруй мянган орон сууц эздэдээ очих боломжтой гэнэ. Одоогоор 3-4 тэрбум төгрөгийн ажлыг хувийн хэвшлийнхэн хийгээд байгаа бөгөөд баригдаж буй барилгуудыг үргэлжлүүлэн барихад ойрын хугацаанд гурван тэрбум төгрөг шаардлагатай аж. Найман байгууллагын 44 албан газар орон сууцны захиалга өгчээ. Орон сууцны барилга барих байршлын хувьд Буянт-Ухаа хороололд 1000, "Нарантуул" худалдааны төвийн орчим 1600, Толгойтод 10 гаруй мянган айлын орон сууц баригдахаар төлөвлөгдсөн байна.

УИХ-аас анх 20 газарт 80 айлын орон сууцууд барих төсөл батлагдсан ч цахилгаан, дулааны шугам сүлжээ зэргээс хамаарч найман байршилд иргэдийн орд өргөө сүндэрлэх зураг төсөл одоогоор хийгдээд байгаа юм байх. Жил ирэх бүр нэмэгдэж байгаа барилгын материалын үнийн хөөрөгдлийг дагаж орон сууцны ханш нэмэгдэхийг дээрх албаны хүмүүс үгүйсгэсэнгүй. Орон сууцны талбайн нэг метр квадрат тутам дунджаар 300-350 мянган төгрөгг багтах юм байна.
2004 оноос анх яригдаж эхэлсэн "40 мянган айлын орон сууц" хөтөлбөр ажил хэрэг болж амжвал хойтон гэхэд 20200 айл ямар ч байсан байртай болох бололтой. "Засгаас мөнгийг нь шийдээд өгчихсөн ч банкууд зээл олгохгүй байгаа гэсэн. Энэ үнэн үү" гэсэн асуултад гэрээнд гарын үсэг зурахаар хүрэлцэн ирсэн банкны захирлууд "Арилжааны банкуудад одоогоор мөнгийг нь байршуулаагүй байгаа. Хэрвээ байршуулчихвал бид иргэддээ заавар журмыг даруйхан танилцуулах болно" гэсэн юм.