Францын "төмөр хатагтай" 120 жилийн ойгоо тэмдэглэж байна. Алдарт Эйфелийн цамхагийг барих ажил 1887 оны долоодугаар сард Парист эхэлжээ. Гүүрийн барилгачин бөгөөд Францаас АНУ-д бэлэглэсэн Эрх чөлөөний хөшөөний төмөр бүтээцийг бүтээсэн инженер Гюстав Эйфель хосгүй төслийн зохиогч байсан юм. 1889 оны гуравдугаар сарын 31-нд цамхаг дээр францын далбаа мандуулж, их буугаар 21 удаа буудаж ёслол үйлдсэн байна. 1929 онд Нью-Йоркт "Крайслер Билдинг" баригдах хүртэл Эйфелийн цамхаг дэлхийн хамгийн өндөр байгууламж байжээ. Уг цамхагийг 18 мянга 38 ширхэг металл хэсгээр угсарч, тэдгээрийг 2 сая 500 мянган тавтай хадаасаар бэхэлсэн байна. Цамхаг 100 мянган тонн жинтэй, 312 метр өндөр хэдий ч, хүчтэй салхинд оройн хэсгийн дайвалзах хэмжээ нь ердөө 6-7 сантиметр ажээ. 1980 онд хотын эрх баригчид өгөршиж хуучирсан цамхагт их засвар хийсэн юм. Ийнхүү хуучирснаар төмөр хатагтай нэг мянган тонноор "турж", харин их засвар хийсний дараа дахин залуужсан байна. Эйфелийн цамхаг жилдээ 6 сая орчим хүн хүлээн авч, хотод 53 сая евро-гийн орлого оруулдаг юм. Өнөөдрийн хүртэл түүний гурван давхарт 200 сая гаруй хүн гарчээ.