Их бүтээн байгуулалт хөтөлбөрийг хэрэгжүүлэх ажлын хэсгийнхэн Шадар сайд М.Энхболдод хөтөлбөрийн хэрэгжилтийн явцыг танилцууллаа.

 

 

Их  бүтээн байгуулалт хөтөлбөр нь хот хөдөөг хамарсан өргөн хүрээтэй хийгдэх олон талт хөтөлбөр юм. Хөтөлбөрийн хүрээн дэх 100 мянган айлын орон сууц нь гурван үе шаттайгаар хэрэгжүүлэхээр төлөвлөжээ. Эхний ээлжинд 2012 он хүртэл бэлтгэл ажил явагдаж 2013-16 оныг барилгачидын оргил үе байх аж. 2017-2035 он гэхэд иргэд орон сууцандаа орж, зээлээ төлөөд дууссан байна. Зээлийн хувьд Хөгжлийн банкаар дамжиж урт хугацаатай, бага хүүтэй олгогдох юм.

 

 

Энэ оны байдлаар бэлтгэл ажлын санхүүжилтийн хувьд нэг их наяд төгрөг шаардлагатай бөгөөд үүнийг инженерийн шугам сүлжээ, газар, цэвэр усны хангамж гээд дэд бүтцийн хүрээнд зарцуулагдахаар төлөвлөгдөж байгаа аж.

 

Хөтөлбөрийн талаар ЗТБХБ-ын сайд Х.Баттулгаас зарим зүйлийг тодрууллаа.

 

- Хөтөлбөр маань өөрөө бага дунд орлоготой иргэдэд чиглэнэ гэж байгаа. Хэрвээ бид уул уурхайгаа түшиглээд баялгаа бүрдүүлж чадах юм бол өнөөдрийн Их бүтээн байгуулалтад шаардлагатай 18 их наяд гэсэн ажлын фронтыг бий болгох юм. Хөтөлбөр маань дотроо авто зам, төмөр зам болон 100 мянган айлын орон сууц гээд цогц зүйл байгаа. Энд ажиллаж байгаа иргэд маань орлого нь нэмэгдэж улмаар орон сууцны зээлд хамрагдах, хөтөлбөрийн хүрээнд баригдах орон сууцыг худалдан авах гэсэн эргэх холбоо бий болох юм. Гагцхүү цаг хугацааны хувьд Засгийн Газраар батлуулах гээд нилээд удаашралтай байлаа.

 

 

- Ерөнхийдөө энэ сарын сүүл ирэх сарын дундаас ажилдаа орж эхлэхээр төлөвлөж байна. Манай яамны зүгээс бүх төлөвлөлтийг нь хийчихсэн байгаа. Энэ бол дан ганц ЗТБХБ-ын яаманд харьяалагдах асуудал биш.  Цэвэр бохир усны хангамж, газар чөлөөлөх, цахилгаан эрчим хүч гээд харъяа газрууд нь бас анхааралдаа авах хэрэгтэй. Сэтгэл зүрхээ нэгтгэж иргэдээ орон сууцаар хангая гэсэн зорилготой хамтран ажиллах хэрэгтэй гэдгийг Засгийн Газрын зарим гишүүд, сайдууд төдийлөн ойшоохгүй байна. Гэр хороолол бол хөрсний бохирдлоос эхлээд гэмт хэрэг, эрүүл мэнд, утаа гээд олон сөрөг үр дагаварыг бий болгож байна.

 

- Барилгын Бараа Материал Үйлдвэрлэгчдийн Холбоотой хамтарч арматур, цемент гэсэн гол нэрийн бүтээгдэхүүний тал дээр дэвшилт гаргах талаар яам хамтарч ажиллаж байгаа.

 

ЗТБХБ-ын Хөрөнгө оруулалт, сургалт судалгаа, барилга захиалагчийн албаны дарга Б.Чинтулга:

 

- Хөтөлбөрт хамрагдахад заавал төрийн албан хаагч байх албагүй.  Сард 300-400 орчим мянган төгрөгийн эргэн төлөлт хийх боломжтой байхад хангалттай. Учир нь бидний тооцоолж үзсэнээр одоогийн нөхцөлд иргэд арилжааны банкны зээлээр 60м² талбайтай хоёр өрөө байр худалдаж авлаа гэхэд сард нэг саяас 1,2 сая төгрөг төлдөг. Энэ нь жилийн 13-16 хувийн хүүтэй гэсэн үг юм. Харин энэ төсөл нь хэрэгжсэнээр иргэдэд жилийн 6-8 хувийн хүүтэй зээл олгоно. Урт хугацаатай, бага хүүтэй зээл олгосоноор иргэд сард 300-400 орчим мянган төгрөгийн эргэн төлөлттэй байна гэсэн үг. Энэ бол арилжааны банкны зээлээс даруй 2-2,5 дахин бага хүүтэй зээл олгогдох юм.

 

- Орон сууцны 75-80 орчим хувь нь зах зээлийн эрэлт нийлүүлэлтээр зохицуулагдана. Үлдсэн 15 орчим хувь нь бага орлоготой иргэдэд зориулагдаж ОССК-аар дамжиж хэрэгжинэ.