Нийслэлийн утааг бууруулж, иргэдийг тухтай амьдруулахын тулд гэр хорооллын айлуудыг орон сууцжуулах ажлыг Нийслэлийн удирдлагууд энэ жил эхлүүлж байна.

Агаарын бохирдол дээд цэгтээ хүрснээс гадна 470 мянган га газар нутагтай Улаанбаатар хотын 27,6 мянган га нь л барилгажсан гэдэг мэдээлэл хотод барилга төлөвлөлтийн ажил дутагдалтай байгааг бэлхнээ илтгэж байгаа юм.

Эдгээрийг харгалзсаны үндсэн дээр энэ жил Сүхбаатар дүүргийн 9, 10, 11, 12 дугаар хорооны нутаг дэвсгэр дэх 210 га газрыг чөлөөлж, орон сууцны цогцолбор бүхий VII хороолол барих ерөнхий төлөвлөгөөг баталсан. Харин энэ ондоо багтааж үүнээс 50 га талбайд орших айлуудыг нүүлгэн, шилжүүлж газар дээр нь барилга барихаар болсон юм.

Долдугаар хорооллыг барихын тулд инженерийнх нь шугам сүлжээ барих, замд байгаа айлуудыг нүүлгэн шилжүүлэх зардалд 20 тэрбум төгрөг төсөвлөсөн. Энэхүү мөнгөөр инженерийн шугам сүлжээ барих замд байрлаж байгаа 512 айл, албан байгууллагын газрыг худалдаж авч, шугам сүлжээ тавих ажлыг эхлүүлэх аж.

Гэсэн ч энэхүү мөнгө эдгээр айлыг нүүлгэн шилжүүлэхэд хүрэлцэхгүй болжээ. Тиймээс энэ мэдээллийн дагуу Нийслэлийн Хөрөнгө оруулалтын газрын ерөнхий инженер Н.Төмөрбаатараас дараах асуултад хариулт авлаа.

-Долдугаар хорооллын инженерийн шугам тавих газрыг чөлөөлөх ажилд төсөвлөсөн 20 тэрбум төгрөг хүрэлцэхгүй. Иргэд газраа чөлөөлөх нь удаашралтай байна гэсэн. Дахин хөрөнгө хуваарилах уу?
-Барилгажуулах ажлын шугам сүлжээний газрыг чөлөөлөх ажлыг тусгай нэгж хариуцаж байгаа. Ийм асуудал гарсан тухай мэдээлэл ирээгүй. Тиймээс ажил хэвийн явагдаж байгаа гэсэн юм.

Харин долдугаар хорооллыг хэрхэн барилгажуулах гэж байгаа талаар Нийслэлийн барилга, хот байгуулалт төлөвлөлтийн газрын Сүхбаатар дүүрэг хариуцсан архитектор Ч.Рэгзмаатай уулзаж, ярилцсан юм.

-Сүхбаатар дүүргийн долдугаар хорооллын 50 га газрыг энэ жилдээ багтаан чөлөөлөх ажлыг хийнэ гэсэн. Энэ газар нь яг аль хэсэгт байрлаж байгаа вэ?
-Дөрөвдүгээр дэлгүүрээс хойшоо 32-ын тойргийг холбосон замын дагуух газрыг хамарч байгаа.

-Энэ газрыг чөлөөлөхийн тулд оршин сууж байгаа айлуудтай нь хэрхэн тохиролцох юм бэ?
-Ерөнхий төлөвлөгөөний шаардлагыг хангаж байгаа бол хувийн компаниуд, иргэд ч долдугаар хорооллын барилгажилтын ажилд оролцох эрхтэй. Харин газрыг оршин суугчидтай нь тохиролцож, гэрээ хийсний үндсэн дээр чөлөөлөх юм. Тухайлбал, хувийн компаниуд иргэдийн газрыг үнэ тохиролцож худалдаж авах, барьсан барилгаасаа өгөх ч юм уу ямар гэрээ хийсэн, түүгээрээ зохицуулах боломжтой.

-Газар чөлөөлсөн иргэдийг байрлуулах түр орон сууц барьж байгаа. Үүнийг хэрхэн ашиглах юм?
-Тийм. Сүхбаатар дүүрэгт Улсын бүртгэлийн ерөнхий газар орчимд 300 айлын түр орон сууцны барилгын ажил эхэлсэн байгаа. Зарим оршин суугч газраа чөлөөлсөн хугацаандаа түрээсээ төлөөд тэнд байж болох бололцоог бүрдүүлэхийн тулд үүнийг хийсэн. Гэхдээ газар чөлөөлсөн оршин суугч бүр энэ байранд байх ёсгүй. Барилгын компаниудтайгаа тохиролцож, газраа худалдаж ч болно шүү дээ.

-Орон сууцжуулах ажилд иргэд өөрсдөө оролцож болно гэсэн. Энэ ямар учиртай юм бэ?
-Долдугаар хорооллын батлагдсан ерөнхий төлөвлөгөөний шаардлагыг хангаж байвал ийм тохиолдол байж болох юм. Энэ нь юу гэсэн үг вэ гэвэл, ганц айл биш хэсэг бүлэг айл нийлж ерөнхий төлөвлөгөөний дагуу хөрөнгийн эх үүсвэрээ бий болгоод барилга бариулах, барилга барих ажил хийж болох юм. Гэхдээ долдугаар хороолол бол өндөр орон сууцны хороолол болох учир шаардлага нэлээд өндөр.

-Хувийн компаниуд барилгажуулах ажилд оролцох эрхтэй гэлээ. Одоогоор ийм ажлыг хийж байгаа компани байгаа юу?
-Одоогоор "Бэрэн" компани болон "Гэзэгийн худаг" констракшн энд барилга барих төсөл дээр ажиллаж байна. Цаашид энд барилга барих сонирхолтой компаниуд манайд хүсэлтээ гаргаж, батлуулсны дараа ажилдаа орох боломж нээлттэй байгаа.

-Энд барилга барихыг хүсвэл ямар шаардлагыг хангах ёстой вэ?
-Мэдээж ерөнхий төлөвлөгөөний стандартад нийцсэн байх. Иргэдтэй гэрээ хийсний үндсэн дээр газрыг чөлөөлөх ёстой. Мөн Хот байгуулалтын хуулийн дагуу өөрийн мэдлийн газрынхаа 70 хувьд нь барилга барьж, үлдсэн 30 хувийнх нь газарт ногоон байгууламж, авто зам, шугам сүлжээний асуудлыг зохицуулах ёстой.

-Эхний ээлжинд 50 га газрыг чөлөөлж, барилгажуулахаар ажиллаж байна. Харин долдугаар хорооллыг хэзээ бүрэн орон сууцжуулж дуусгахаар төлөвлөсөн бэ?
-Долдугаар хорооллыг 2030 он гэхэд бүрэн орон сууцжуулах төлөвлөгөөг баталсан.