Эргэдэг цамхаг
Barilga
2019-11-05
Италийн архитектор Девид Фишер, 2008 оны 6 сарын 24-нд , дэлхий дээрх анхны “Эргэдэг цамхаг”-ийн төслийг дэлхий дахинд албан ёсоор танилцууллаа. Зохиогчдын төлөвлөж буйгаар энэхүү төсөл бодит биелэлээ олон хэрэгжих хүртэл хоёр хүрэхгүй жил зарцуулах аж. Өндөр барилгын хийцийн хувьд шийдвэрлэхэд төвөгтэй үндсэн асуудлуудын нэг нь зүй ёсоор салхины ачаалал байдаг. Хөдөлгөөнт архитектурын жишээ болох “Эргэдэг цамхаг”-ийн шийдэлд энэ асуудлыг маш чадварлаг шийджээ.
Английн “Динамик Архитектур Груп” фирмийн хамтарсан бүтээл, энэхүү төслийг одоогоор хоёр хотод хэрэгжүүлхээр шийдвэрлээд байгаа бөгөөд хооронд нь харьцуулвал эрс ялгаатай боловч өнөөдрийн тэнгэр баганадсан өндөр барилгуудын өрсөлдөөнд тус бүрийн байр суурийг баттай тодорхойлоод байгаа Дубай болон Москва хотуудыг сонгон авчээ. Дубай хот нь Фишерийн сонгосон хамгийн эхний байршил юм. Тэрээр хэлэхдээ “Дубай бол ирээдүйн хот. Мэдээж энэхүү ирээдүйн барилга ирээдүйн хотод байх нь зохистой” гэжээ. Фишер, Оросуудын тавьсан саналыг хүлээн авснаар Москва хотыг дараагийн байршил болгон сонгоход хүрээд байгаа юм байна.
Дубайд баригдах барилга нь 80 давхар хүрэх бөгөөд дээд талын 10 давхар нь “Вилла” (Villa) загварын өндөр зэрэглэлийн сууц, түүний дор 35 давхарт ердийн орон сууц, дараагийн 15 давхарт зочид буудал, доод талын 20 давхарт худалдаа, үйлчилгээ байхаар төлөвлөжээ. Хэсэгчилсэн хуваалт бүхий энэхүү цамхагт давхар бүр нь тусдаа, бие даан төвөө тойрч эргэх боломжтой технологи бүтээснээр, нэгээс гурван цагийн хооронд бүрэн солигдож байх нэгэн хэвийн бус үзэгдэх орчинг барилгын дотоод орон зайгаас харах боломжийг бүрдүүлжээ.
“Зарим тал дээр ердийн барилгуудаас илүү сул талууд тухайн барилгад үүсэх болов уу?” гэсэн сурвалжлагчийн асуултанд Фишер хариулахдаа: “Архитекторууд өөрсдийн гаргасан төлөвлөлт, дизайнд тохируулан шаардлагатай бүхий л зүйлсийг барилгад нийцүүлэн бүрдүүлдэг байх хэрэгтэй. Ингэснээр ямар нэг шийдэл олохын тулд толгойгоо ажиллуулж бодож сэтгэх замыг нээдэг … ,мөн хүмүүс аливаа зүйлийг олон талаас нь бодож, тунгааж эхлэх болно” гэжээ.
Эргэдэг Цамхаг нь Итали архитекторын анхны тэнгэр баганадсан өндөр барилгын дизайн боловч зохиогч энэхүү бүтээлдээ бүрэн итгэлтэй байгаа гэнэ. “Би өндөр барилгуудын төсөл хийж байгаагүй, гэсэн хэдий ч үүнийг хийхэд хэдийнэ бэлэн болсныг мэдэрч байна” хэмээн дурдсан байна.
Эргэдэг Цамхагийн дизайнд нарны эрчим хүч цуглуулах төхөөрөмж, салхин хөдөлгүүр хэрэглэх бөгөөд барилга өөрийн эрчим хүчний хэрэгцээг хангаад зогсохгүй зохиогчийн хэлж буйгаар зэргэлдээ барилга байгууламжуудад нийлүүлэх хэмжээний хангалттай эрчим хүчийг гарган авах боломжтой гэнэ. Нарны эрчим хүч цуглуулах төхөөрөмжүүд давхар бүрийн дээд талын гадаргуу (давхар бүрийн дээвэр дээр) дээр байрлана. Цамхагийн төслөөр эрчим хүч үйлдвэрлэх хослосон бололцоог дэлхий дахинд харуулах боломжтой. Зохиогчийн хэлснээр Италид одоо байгаа барилгууд дээр туршилт хийж үзсэн бөгөөд дэлхийн томоохон хотуудад ч мөн адил энэхүү салхин хөдөлгүүрийг ажиллуулах хэмжээний салхины эх үүсвэр хангалттай байдаг гэнэ. Мөн энэхүү цамхаг нь хамгийн анхны угсармал (урьдчилан үйлдвэрт бэлтгэсэн эд ангиудаас бүрдсэн) тэнгэр баганадагч болох ажээ. Москва, Дубайд баригдах барилгуудын эд ангиудыг тун удахгүй Италийн өмнөд хэсгийн үйлвэрүүдэд үйлдвэрлэж эхлэх бөгөөд хэдэн сарын дараа барилгын талбай дээр ажил эхлэнэ гэдэгт итгэлтэй байгаа гэнэ. Фишерийн хүсэж буйгаар дараагийн удаад Нью Йорк сонгогдох ажээ.
