Монголд сүүлийн 20 гаруй жил томоохон бүтээн байгуулалт хийгээгүй юм. Уул уурхайн салбар хөгжиж эхэлснээр аж үйлдвэрийн томоохон бүтээн байгуулалт хийх эхлэл тавигдаж байна. Бүтээн байгуулалтын салхийг хагалж, Оюутолгой төслийн Баяжуулах үйлдвэр өнгөрсөн хавраас эхлэн баригдаж буй. Энэ үйлдвэр ашиглалтад орвол олборлолт эхэлж, ажилд орох гэсэн хүлээлт хүмүүсийн дунд бий билээ. Оюутолгой төслийнхөн Баяжуулах үйлдвэрээ 2012 онд ашиглалтанд оруулахаар шаргуу ажиллаж байгаа. Энэ үйлдвэр өдөрт 100 мянган тонн хүдэр боловсруулах хүчин чадалтай юм.

Баяжуулах үйлдвэрийн барилгын нийт гүйцэтгэл өнөөгийн байдлаар 9 хувьтай байна. Үүнд барилгын үндсэн суурийн цемент цутгалтын ажил орж байгаа юм. Баяжуулах үйлдвэрт 144000 шоо метр цемент цутгахаас 57 мянган шоо метрийг нь өнгөрсөн долдугаар сарын 17-ноос хойш цутгаад байна. Одоогийн байдлаар барилгын суурь цутгалт, туузан дамжуулагч, хайрган бутлуурын ажил үргэлжилж, анхдагч бутлуурын бэлтгэл ажил эхлээд байна. Туузан дамжуулагч гэдэг нь хүдэр анхдагч бутлуураас үйлдвэр рүү ирэх газар дээрх 3.6 км зам юм. Тэгээд анхдагч бутлуураас гарсан хүдрээ нэг газарт бөөгнүүлээд эргэх холбоо бүхий туузан дамжуулагчаар хайрган бутлуур руу оруулж жижиглэнэ. Энэ хайрган бутлуурын барилгын өндөр 30 метр бөгөөд цементээр цутгах ажил нь дуусаад байна. Мөн хөрс булалт буюу ухсан газруудаа буцааж сэргээх 1 сая шоо метр газар шорооны ажил хийх юм. Үүний 17 хувийг гүйцэтгээд байгаа ажээ.

Баяжуулах үйлдвэрийн төслийн барилгын менежер Лий Эдуард Кокс бүтээн байгуулалтын ажлын явцын тухай “Өнөөдрийн байдлаар үйлдвэрийн барилга дээр 900 ажилтан ажиллаж байна. Мэдээж өвлийн цагт энэ тоо бага зэрэг буурна. Төлөвлөгөөний дагуу өвөл суурийн цемент цутгалт, газар шорооны ажил үргэлжилнэ. Мөн дотоод ажлууд хийгдэнэ. Хавраас гагнуур, механик, цахилгааны ажил эхэлнэ. Бидний хамгийн том бэрхшээл бол ложистик. Мөн цаг агаарын байдлаас барилгын үйл явц хамаарч байна” гэж өгүүллээ.

Оюутолгой төслийн талбай дахь их бүтээн байгуулалтын гол хэсэг нь энэ Баяжуулах үйлдвэр юм. Энэ үйлдвэр нийт 1.2 тэрбум ам.долларын өртөгтэй босно. Ингээд уг үйлдвэр хүчин чадлын хувьд дэлхийд тэргүүлэх 5-д орох юм байна.