Тоосго нь хамгийн их  хэрэглэгддэг барилгын материалуудын нэг билээ. Тоосгыг барилгад хэдэн мянган жилийн өмнөөс ашиглаж иржээ. Барилгад тоосгыг ашигласан энэ хугацааны туршид түүнийг хийх арга ажиллагаа бараг өөрчлөгдөөгүй байна. Тоосгоор барьсан байшин архитектур илэрхийлэмж сайтай болохын дээр илүү бат бөх болдог. Тоосгон болон цутгамал тоосгоор босгосон сууц дулаан дамжуулалт болоод дуу тусгаарлах чанар өндөртэй.
Тоосгоор барьсан байшингийн үндсэн давуу тал нь байшингийн бат бэх, урт удаан эдэлгээ, хүйтэнд тэсвэртэй байдлаар тодорхойлогдоно. Модоор барьсан байшинтай харьцуулахад тоосгон байшин нь өөрийн гадаад болон ашиглалтын шинж чанараа алдалгүйгээр хамаагүй удаан хугацаанд сууц болдог. Гэхдээ тоосгоор байшин барихад зардал нилээд өндөр гардаг нь түүний гол дутагдал гэхэд болно. Түүнээс гадна, түр суухад тоосгон байшин нь төдийлөн тохирохгүй, тухайлбал, хэрвээ зуслангийн сууцаа тоосгоор барьсан бол байнга халааж байх шаардлагатай байдаг. Энэ нь нөгөө талаас, ихээхэн хамжээний дулааны зардал гаргаж болно гэсэн үг юм.

Өнөө үед барилга барихад керамик болон силикатын тоосго гэсэн үндсэн 2 төрлийн тоосгыг ашиглаж байна.

Керамик /шавар/ тоосгыг бэхжүүлэгчтэй буюу шар шаврыг дангаар нь хийдэг. Хэвлэсэн нойтон тоосгыг 900-1300 хэмийн халуунд шатаах бөгөөд ингэснээр бат бэх, усанд тэсвэртэй, ус үл нэвтрүүлэх, хүйтэнд тэсвэртэй, ашиглагдах хугацаа нь уртсах шинж чанартай болно. Керамик тоосго нь цайвар улаанаас хүрэн хүртэл өнгөтэй байна.
Цул керамик тоосгыг даацын хана, тулгуур багана, суурь болон барилга байгууламжийн бүтээцэд даац хамгийн ихээр ирдэг хэсгүүдэд ашиглана. Тоосгоны сүвэрхэг шинж нь дулаан тусгаарлах, өнгөлөх бодисын уусмал нэвчих чанар хир байхыг харуулна. Тоосгоны ус шингээх чанар 8%-с доошгүй, хүйтэн тэсвэрлэх чанар 15 циклээс багагүй байх ёстой. Гэвч цул тоосгоны дулаан дамжуулах эсэргүүцэл бага учраас түүгээр барьсан ханыг нэмж дулаалах шаардлагатай байдаг.
Нүхтэй керамик тоосгыг өнгөлгөөний хана, мөн дотор хана, өрөө тусгаарлах хана өрөхөд ашиглана. Харин даац авах хэсгүүдэд хэрэглэж болохгүй. Түүний давуу тал нь жин багатай, түүнийгээ дагаад барилгын сууринд бага ачаалал өгдөгт оршиж байгаа болно.

Силикатын тоосго нь керамик тоосготой харьцуулахад илүү бат бөх чанартай бөгөөд ийм учраас дулаан дамжуулалт өндөртэй болоод ус тэсвэрлэх чанар муутай байна. Керамик тоосгоноос хямд үнэтэй байдаг ч хэрэглэх хүрээ нь хязгаарлагдмал. Даацын хэсгүүдэд ашиглаж болдоггүй ч өнгөлгөөний хана, өрөө тусгаарлах хана барихад тохиромжтой байдаг. Силикатын тоосгыг цэвэр кварцын элс, усны нэг төрлийн холимгийг тусгай прессээр шахаж хийдэг. Тоосгыг шахсаны дараа автоклавт 175 хэмийн халуунд 0,8 МПа даралтын дор ханасан уураар шарна. Мөн өнгөтэй силикат тоосго хийдэг. Керамик тоосготой адил нүхтэй силикат тоосго нь хөнгөн учраас суурьт бага даралт өгдөг, дулаан дамжуулах чанар багатай болох тул ямар нэгэн дулааны алдагдалгүйгээр нимгэн хана барих боломжийг олгодог гэхэд болно.