АНУ-д төвтэй CTBUH буюу “Өндөр барилга, хот төлөвлөлтийн зөвлөл” хэмээх олон улсын байгууллагаас дэлхийн хөгжингүй улс орнуудын нүүр царайг илтгэсэн дизайн архитектурын өвөрмөц шийдэл бүхий өндөр барилгуудын жагсаалтыг улс орны нэрсийн дарааллаар жагсаан гаргадаг байна. Энэхүү олон улсын байгууллагаас энэ оны 9-р сард гаргасан жагсаалтанд манай улс албан ёсоор бүртгэгджээ. Өндөр хөгжилтэй орнуудын тэнгэр баганадсан сайхан барилга байгууламжуудыг монголчууд зөвхөн киноноос үздэг байсан цаг улирч алдарт Бурж Халифа, Чикагогийн Виллис цамхаг, Оросын Москва цамхагуудтай зэрэгцэн олон улсад өөрийн орны нүүр царайг илтгэх нэгэн сайхан байгууламжтай болсныг энэхүү бүртгэлээс харж болохоор байгаа.

 

Тэрхүү барилга байгууламж бол “Чоно” корпороцийн захиалгын дагуу баригдаж, тун удахгүй ашиглалтанд орох гэж байгаа “Blue Sky” цогцолбор юм байна. “Blue Sky”цогцолборын тухайд барилгын хэлбэр нь дарвуулт усан онгоцыг дүрсэлсэн төдийгүй Монголын мөнх хөх тэнгэрийг бэлэгдсэн цэнхэр өнгийг сонгон бүтээжээ. Зөвхөн гаднах дүр дүрслэлээрээ биш “Blue Sky”цогцолборын бусад үзүүлэлтүүд ч уг жагсаалтанд бүртгэгдэх шалгуурыг давсан юм билээ. Зарим нэг үзүүлэлтээс нь дурьдвал уг цогцолборыг барьсан ганжуулсан шил нь 35м/сек хурдтай салхийг буюу нэг ам метр талбай нь 251кг даралт тэсвэрлэх чадвартай нь туршилтаар батлагджээ. Тэнгэр баганадсан шилэн барилгуудыг SRC буюу ган карказ болон төмөр бетонон угсралт хосолсон технологи ашиглан барьдаг.  “Blue Sky” цогцолборыг энэ технологоор барьсан бөгөөд 25 давхар, 105 метр өндөртэй архитектурын орчин үеийн шийдэлтэй энэ бүтээлийн эх зургийг БНСУ-ын “А Групп” компанийн архитектор Ким Дук Кюн хийсэн аж.

 

Дэлхийн том хотуудын 60-аас дээш давхар тэнгэр баганадсан шилэн барилгууд, түүн дотор Арабын нэгсэн Эмиратын бахархал “Burj Khalifa”. АНУ-ын Чикаго хотын нүүр царай “Willis Tower”-ыг ч энэ технологиор босгожээ.