Өнөө жил нийслэлийн хэмжээнд 18 хороо шинэ цогцолбор байртай болж байна. Баянгол дүүрэгт гэхэд л 7,10,15,48 гэсэн дөрвөн хороо шинэ байртай болж, өнөөдөр 10,15 дугаар хороонд шинэ байрандаа төвхнөлөө. Хүн ам, орон сууцны тооллогын урьдчилсан дүнгээр 15,800 хүн тоологдсон 10 дугаар хороо гэхэд ачаалал ихтэй ажилладаг бөгөөд инженерийн шугам сүлжээнд холбогдсон байрныхаа нээлтийг өнөөдөр хийсэн юм.

Нийслэлийн Засаг дарга бөгөөд Улаанбаатар хотын Захирагч Г.Мөнхбаяр хорооны цогцолбор байрны нээлтэд оролцож хэлсэн үгэндээ, төрийн үйлчилгээг иргэдэд түргэн шуурхай хүргэх үүднээс хороодыг бэхжүүлэх, орон байртай болгох ажлыг эрчимжүүлж, иргэдэд чиглэсэн үйл ажиллагааг боловсронгуй болгож, шинэ шатанд гаргах талаар хичээж ажиллаж буйгаа онцолсон байна. Нийслэлийн цөөнгүй хороодод ачаалал их байгаа бөгөөд ирэх жил шинээр хороод үүсгэн байгуулах асуудлыг ирэх сард хуралдах НИТХ-аар шийдвэрлэх юм.