Хэдхэн хоногийн өмнө үзэглэсэн Анкарагийн гудамжыг иж бүрэн тохижуулах ажлын техникийн нарийвчилсан судалгааг хийх Анкара хотын төлөөлөгчид Улаанбаатарт хүрэлцэн ирлээ. БНТУ-ын Анкара хотын Ерөнхий нарийн бичгийн даргын орлогч болон Анкара хотын хот тохижилтын газрын дарга нар өнөөдөр хотын удирдлагуудтай уулзаж, санал солилцлоо.

Нийслэл ирэх жил Цэцэг төвийн уулзвараас хойш бага тойруугаар тойрч МУБИС хүртэлх замыг засварлахаар төлөвлөж, замын ажлын гэрээг хийгээд байгаа.

Тийм болохоор энэхүү зам засварын ажилд хамрагдах Анкарагийн гудамжны тохижилтын ажлыг хийхдээ тус замын ажилтай нягт уялдуулж, эхлээд шугамын засвараа хийж, дараа нь замаа засч, тохижилтын ажил, гэрэлтүүлгийг сүүлд нь хийнэ гэсэн дарааллаар явах юм. Хотын дарга БНТУ-ын Засгийн газрын хөрөнгөөр хийгдэх энэхүү тохижилтын ажлыг чанартай сайн болгоход хотын зүгээс шаардлагатай бүхнийг хийх болно гэдгээ энд хэлсэн үгэндээ онцлоод, Улаанбаатар, Анкара хотуудын харилцаа протоколь, ёслолоос илүүтэйгээр бодит ажил хэрэг болж байгаад нийслэлчүүдийнхээ өмнөөс талархаж байгаагаа илэрхийллээ.