Нийслэлийн алслагдсан дүүргийн нэг болох Багануур дүүрэгт өнөө жил хийгдсэн хөрөнгө оруулалтын ажлын сүүлийг мушгиж, 4 дүгээр хорооны цогцолбор байр болон 75 хүүхдийн цэцэрлэг, саун бүхий халуун усны газар ашиглалтад орлоо. Ингэснээр анх вагончикт ажлаа явуулж байсан хорооныхон цагдаа, өрхийн эмнэлэг бүхий цогцолбор байранд иргэддээ үйлчилж, гэр хорооллын иргэд анх удаагаа халуун усны газарт саунд тухлан суух  боломжтой болж байгаа юм.

Эдгээр бүтээн байгуулалтын ажлын нээлтэд оролцсон, нийслэлийн Засаг даргын нэгдүгээр орлогч Б.Баатарзориг энд хэлсэн үгэндээ,  Улаанбаатарын хөгжил Сүхбаатарын талбайгаа тойроод бус захын дүүрэгтээ хүрч ирж буйг онцлоод хөрөнгө оруулалтаар хийгдэж буй ажлуудын дийлэнх нь гэр хорооллын иргэдийн тав тухтай амьдрах нөхцлийг сайжруулах, төрийн үйлчилгээг иргэддээ түргэн шуурхай хүргэхэд чиглэж байгааг онцолсон байна.

Тус дүүргийнхэн 30 жилийнхээ ойн хүрээнд 30 бүтээлч ажил хийсний зэрэгцээ гэр хорооллоо барилгажуулах ажлын бэлтгэлийг хангаж, инженерийн шугам сүлжээ, гэрэлтүүлэг, зам тавьж дуусчээ. 1080 айлын цогцолбор хороолол барих ажлыг эхлүүлж, эхний барилгаа он гараад ашиглалтад хүлээн авах бөгөөд 2013 он гэхэд иж бүрэн дуусах ажээ.