Барилгын материалын томоохон захуудад нэг уут цементийн үнэ 7500 төгрөгөөс буухгүй хэвээр байна. Харьяа яам, байгууллагуудаас ажлын хэсэг хүртэл гарч үнэ өссөн шалтгааныг тогтоосон хэдий ч үр дүн  нь харагдахгүй л байна.
Барилга, хот байгуулалтын яам, Зам тээвэр, аялал жуулчлалын яамны ажлын хэсгийнхэн цементийн үнэ өсч буй гол шалтгаан нь төмөр замын ачааны вагон хүрэлцээгүйгээс тээвэрлэлт удааширч улмаар үнэд нөлөөлж байна хэмээн тогтоож, Төмөр замын хэрэг эрхлэх газар, УИХ-ын Байнгын хороодод албан бичиг хүргүүлсэн билээ. 
Шалгалтынхны дүгнэлтийн дагуу өдөрт 40-50 вагон ачаа тээвэрлэж байсныг 70 болгож нэмэгдүүлсэн. Гэтэл өчигдрийн байдлаар барилгын материалын “Гурвалжин” захад нэг шуудай монгол цемент 7590, хятад нь 8000 төгрөгийн ханштай байв. Бүтээн байгуулалтын гол зэвсэг болсон цементийн үнэ яагаад буурахгүй байгаа талаар Барилга, хот байгуулалтын яамны Барилга, орон сууц, нийтийн аж ахуй, бодлого зохицуулалтын газрын мэргэжилтэнээс тодруулсан юм.
 -Цементийн үнэ буурахгүй байгаа нь юутай холбоотой вэ?
-Цементийн үнэ огт буураагүй гэж хэлэхгүй. Ажлын хэсгийн дүгнэлтийн дагуу Улаанбаатар төмөр зам ачааны вагоныхоо тоог нэмэгдүүлэхээс эхлээд нэлээд арга хэмжээ авсан. Ямартай ч наадмын өмнө нэг тонн цемент 150 мянган төгрөгт хүрч байсан. Харин энэ сарын 14-ний байдлаар 130 мянга болж хямдарлаа.
-Жижиглэн худалдаалах үнэ буураагүй байна лээ?
-Жижиглэнгийн үнэ буурахгүй байгаа нь наймаачдын бодлоготой холбоотой байх. Барилгын материалын наймаачид болон импортлогчид цемент ачсан вагоноо шуурхай суллаж өгөхгүй байгаагаас Замын-Үүдийн Төмөр замын шилжүүлэн ачих хэсэгт дахиад л түгжрэл үүсэж байгаа. Ямар их хүч гаргаж, ачиж ирснээ мартчихаад вагоноо чөлөөлөхгүй байна. Магадгүй зарим наймаачин цементээ заралгүй дарж үнийг нь хөөргөдөж байхыг үгүйсгэхгүй.
-Үнийг бууруулах талаар цаашид ямар арга хэмжээ авах вэ?
-Барилгын материалын асуудал хариуцсан газрууд хэрэгжүүлж буй ажлаа манай ажлын хэсэгт мэдээлэх ёстой. Наадам таарч ажил жаахан удааширсан. Маргаашаас ажилдаа идэвхийлэн орно.