Хаалгыг нь чангахан хаахад таазнаас нь шороо бургилан унаж, хананд нь цууралт үүсэх энэ модон байшин нийслэлийн Чингэлтэй дүүргийн 31 дүгээр цэцэрлэг.

1955 онд анх орон сууцны зориулалтаар баригдсан гэх энэ барилга Мэргэжлийн хяналтын газрын шалгалтаар. үйл ажиллагаагаа зогсоох, хаах хүртэл шийдвэр хүлээж авчээ. Гэсэн ч "Дэнжийн мянга"-аар овоглох гэр хорооллын дунд Чингэлтэй дүүргийн дөрвөн хорооны 100 гаруй хүүхдэд сургуулийн өмнөх боловсрол олгох гээд өнөөдрийг хүртэл хаалгаа барьж чадахгүй үйл ажиллагаагаа явуулсаар иржээ.

Баригдаад олон жилийн нүүр үзэж байгаа энэ барилга өнөөдөр нурахад ойрхон байна. Өрөө тасалгаа нь хэтэрхий жижиг учраас өргөтгөл хийж багтаамжийг нь сайжруулах ч арга алга. Жил бүр урсгал засвар гэсэн нэрийн дор өнгөлөн далдлалтаас өөрийг хийж чаддаггүй хэмээн цэцэрлэгийн эрхлэгч ярьсан.

Зориулалтын бус тус барилгад жил бүр нуралт үүсдэг. Түүнийг нь олон удаа шавардаж аргалсаар тэр нь хүүхдийн зулай дээр унадаг болжээ. Зуны цагт дээврээс ус байнга гоождог. Одоо засвар хийгээд ч нэмэргүй. Дахин ашиглах боломжгүй, үйл ажиллагаагаа зогсоох, хаах шийдвэр хүлээж авсан ийм барилга нийслэлийн хэмжээнд нэг биш, нэлээд хэд бий гэж бодохоор бяцхан хүүхдүүдийн ирээдүй тун бүрхэг байна.

Уг нь хүүхэд хамгийн цэвэр, аюулгүй орчинд сурч хүмүүжих ёстой гэдэг. Гэтэл үнэн хэрэгтээ тэд нэг л өдөр дээрээс нураад ирэх навсгар байшинд үхэл, амьдралыг ч үл ялган сурч, хүмүүжиж байна.

Тус цэцэрлэгийн эрхлэгч 2010 оны дөрөвдүгээр сарын 10-ны өдөр Нийслэлийн мэргэжлийн хяналтын газраас цэцэрлэгийн үйл ажиллагааг бүрэн зогсоох тухай мэдэгдэл ирсэн. Мөн наймдугаар сарын 24-ны өдөр Онцгой байдлын газраас үйл ажиллагаа явуулахыг хориглосон шийдвэр гарсан. Гэсэн ч шинэ цэцэрлэг баригдах хүртэл хуучин муу байшиндаа хичээлийн шинэ жилийг угтахаас аргагүй байна гэж байсан.

Мэргэжлийн байгууллагаас сургууль, цэцэрлэгийн барилгад хяналт шалгалт хийгээд хэзээ мөдгүй нурах аюултай, сургалтын үйл ажиллагаа явуулах боломжгүй гэдэг дүгнэлтийг гаргаад, хаах хүртэл шийдвэр гаргасан ч бодит амьдрал дээр байдал ийм байна.

Нийслэлийн хэмжээнд 31 дүгээр цэцэрлэг шиг 1960-аад оноос өмнө баригдсан, урсгал засвар хийхээр байсан ч арчилгаа авахаасаа нэгэнт өнгөрсөн найман сургууль, цэцэрлэгийн барилга бий гэж салбар хариуцсан мэргэжилтнүүд хэлж байсан.

Тухайлбал, Дэнжийн мянгын гэх энэ цэцэрлэгээс гадна Баянзүрх дүүргийн 11 хорооны 64 дүгээр цэцэрлэг, Баянгол дүүргийн 22, 70 дугаар сургууль, Сүхбаатар дүүргийн 130, 150 дугаар цэцэрлэг, Баянзүрх дүүргийн 92 дугаар сургууль үйл ажиллагаа явуулж болохгүй гэсэн дүгнэлт гарчээ.

Хана нь цуурсан, дотор тааз нь нурах дөхсөн, цахилгаан шугам сүлжээ нь навсайж, нооройчихсон ийм л орчинд нийслэлийн 20 мянга орчим хүүхэд суралцдаг аж.

Бидний ирээдүй хойч гэж ярих дуртай хүүхэд багачууд ийм л үжирч муудсан модон байшинд эх орныхоо хөгжилд хувь нэмэр оруулах гээд номын дуу сонсч сууна. Тиймээс нэг л өдөр сургууль, цэцэрлэгийн барилга нурж хүүхэд дарагджээ гэвэл та битгий гайхаарай.

Б.Энхтуул