Хүүхэд хөгшдийн нарлаж тоглох байрны гаднах багахан талбай руу арааны шүлсээ асгаруулагчид олон. Зарим нь ч цэцэрлэг, гарааж барина хэмээн элдэв цаас барьж гүйн дарга даамлуудаас зөвшөөрөл авчихдаг. Тэгээд газрыг чинь  худалдаад авчихсан гэж даналзаад нэг л өглөө босоход том том кран, машинуудыг оруулж ирээд газрыг ухаад, хашаа хатгачихдаг. Тэд нийтийн эзэмшлийн талбай дээр барилга барина гэж улайрахаас биш иргэдийн ая тухтай амьдрах эрхийг зөрчиж байгаагаа үл тооно. Өглөөний нарны туяа цонхоор тусч өдөржингөө ээдэг гэрэл гэгээг нь хаагаад,  цонхонд нь бараг тулгаад барилга барин  алхах, гишгэх зайгүй шахам болгох гэж байгаагаа үл хайхарна. Ер нь орон сууцнуудын гаднах жаахан талбай нь  нийтийн эзэмшлийнх бөгөөд аливаа зүйл хийхээр болбол оршин суугчдаас асууж, зөвшилцөж байж шийдэх ч хуультай юм билээ. Ийм нэгэн түрэмгийллийг  Сонгинохайрхан дүүргийн 17 хорооны 32, 33 дугаар байрны оршин суугчид нийлж эсэргүүцэн хатгасан хашааг нь нурааж, ухсан нүхийг нь иргэд оршин суугчид өөрсдийн санаачилгаар мөнгө цуглуулж машин хөлслөн таглан зогсоожээ. Ингээд  Сонгинохайрхан дүүргийн 17 дугаар хорооны 33 дугаар байрны оршин суугч Ш.Отгон-Өлзийгээс зарим зүйлийг тодрууллаа.

- Ямар хүмүүс байрны дундах талбай дээр барилга барих гэж зүтгэсэн юм бэ. Газрын зөвшөөрлийг нь хэн өгсөн юм бол?
- Нийслэлийн Сонгинохайрхан дүүргийн 17 дугаар хорооны 32,33 дугаар байрны дунд буй нийтийн эзэмшил газрыг анх газрын дуудлага худалдаагаар “Аду инвестмент” ХХК-д Нийслэлийн Засаг даргын  2004 оны 63 тоот захирамжаар газар эзэмших эрх өгчээ. Тухайн газрыг тус компани нь 2008 оныг хүртэл ашиглаагүй. Газрын тухай хуулийн 40 дүгээр зүйлийн 1.6 дахь /Хүндэтгэн үзэх шалтгаангүйгээр гэрээнд заасан зориулалтын дагуу тухайн газраа 2 жил дараалан ашиглаагүй / тохиолдолд газар эзэмших гэрчилгээ хүчингүй болно  гэсэн хуулийн заалт байдаг. Хуульд зааснаар хоёр жил ашиглахгүй бол газрын зөвшөөрлийг хүчингүй болгох ёстой  атал дөрвөн жилийн дараа М.Алгирмаа гэдэг хүнд шилжүүлсэн байгаа юм. Манай тойргоос бидний итгэлийг өвөрлөн НИТХ-д сонгогдсон Нийслэлийн Засаг дарга асан, одоогийн нийслэлийн Иргэдийн хурлын дарга Т.Билэгт 2008 оны 08 дугаар сарын 25 ны 379 тоот захирамжаар иргэн М.Алгирмаад  дээрх газрыг шилжүүлсэн байна. Тэгээд энэ Алгирмаа гэдэг хүн 32,33 дугаар  байрны дундах нийтийн эзэмшлийн 88 ам. метр талбай дээр барилга барихаар өнгөрсөн оны аравдугаар сард хашаа хатган, газар ухаж эхэлсэн. Үүнийг зэргэлдээ хоёр байрны оршин суугчид эсэргүүцэж тэмцсэн юм.

- Газрын зөвшөөрлийг шилжүүлснийг Нийслэлийн газрын албаныхан хэрхэн тайлбарлаж байна вэ?
- Дээрх газрын маргааны талаар иргэд бид манай тойргоос сонгогдсон УИХ-ын гишүүд, Монгол Улсын Ерөнхийлөгчид ч хандсан. Тэр хүмүүс нийтийн эзэмшлийн энэ талбай дээр яагаад газрын зөвшөөрлийг шилжүүлэн өгснийг тодруулахаар бичиг илгээсэн байна лээ. Түүний хариуд нь  Нийслэлийн газрын албаны дэд дарга Э.Ариунгэрэл 2010 оны есдүгээр сарын 20-нд   тайлбар өгсөн байсан.

- Ямар тайлбар өгсөн бол?
- Уг тайлбарт иргэн М.Алгирмаа нь дээрх оршин суугчидтай зөвшилцсөний үндсэн дээр барилгын ажлыг эхлүүлэх боломжтой гэсэн тайлбар өгсөн байсан. Гэвч иргэн М.Алгирмаа  оршин суугчид биднээс  саналыг бичгээр болон амаар авалгүйгээр хоёр давхар цэцэрлэг барина гэж 32, 33- дугаар байрны СӨХ-ийн гүйцэтгэх захиралтай хамтран ажиллах хууль бус гэрээ байгуулсан.  Хоёр давхар цэцэрлэг барина гэж зөвшөөрөл авсан ч зургаан давхар  орон сууц барихаар зураг төслөө гаргасан байв.  Уг гэрээг иргэд, оршин суугчид бид эсэргүүцэж 33-р байрны СӨХ-ийн гүйцэтгэх захирал ч гэрээг хүчингүй болгож цуцалсан тухайгаа иргэн М.Алгирмаад 2010.09.24-нд мэдэгдсэн юм билээ. Гэтэл  иргэн М.Алгирмаа нь үүнийг үл хайхарч барилгын ажлыг хамгаалалтын албаны олон тооны хүнээр хамгаалуулан эхлүүлсэн юм. 

СӨХ-ийн гүйцэтгэх захирал бидний өмнөөс гэрээ байгуулах гэж байгаа болон байгуулсан талаараа сууц эзэмшигчид, оршин суугчид бидэнд мэдэгдээгүй. Тэгсэн атлаа 2 давхар цэцэрлэг барина гэж гэрээ байгуулсан байгаа юм. 6 давхар орон сууц болж хувирсан 6 давхар цэцэрлэгийн стандартыг иргэд бид хайгаад олоогүй.  Муугаар бодоход 4 давхарт гал гарахад цэцэрлэгийн хүүхдүүд өөрийнхөө амийг аварч гарч амжих уу гэдэг эргэлзээтэй. 13 дугаар хороололд яг ингэж цэцэрлэг гэж барилга барьчихаад дараа нь цэцэрлэг ашиггүй юм байна, хүүхдийн ирц бүрдэхгүй юм гэхчлэн үнэн худал шалтаг зааж, буудал, бар, караоке болгосон жишээ олон бий.  

- Барилгын суурь ухснаас болж цахилгааны утас, ус зайлуулах хоолой ил гарсан юм уу?
- Барилгын суурийг ухахад 32, 33 дугаар байрны үерийн ус зайлуулах хоолой болон өндөр хүчдэлийн цахилгааны утас ил гарсан. Мөн тус 2 байрны цэвэр бохир усны үндсэн шугам сүлжээн хажууд нь 2-3 метерт байгаа энэ шугамийг өмнөх зун 14 хоног халуун хүүтэн усгүй хэсэг хүлээсэний эцэст бүтэнээр шинээр солисон. Усны шугамд дахин шинэчлэлт, засвар үйлчилгээ хийх болход баригдна гээд байгаа барилгаа нүүлгэх үү? улмаар Цахилгааны ил гарсан утсанд хүүхэд, хөгшид хүрч тогонд цохиулах, нүхэнд унах аюултай нөхцөл бүрдсэн. Нэг хэсэг манай байрны гадна талцсан маргаан шуугиан байнга дэгдэж хэцүү байлаа. “ЖСК” гэсэн компаниар барилга бариулахаар М.Алгирмаа гэрээ байгуулсан юм билээ. Оршин суугчид хүчтэй эсэргүүцсэн учир тус компани ухсан шороогоо ачаад явчихсан. Тэгэхээр нь бид асгасан газрыг нь хайж олоод дундаасаа мөнгө цуглуулж машин хөлслөн ачуулж нүхэнд нь буцааж асган бөглөсөн. Ингэж л оршин суугчид байрныхаа гаднах талбайгаа хамгаалж үлдсэн юм. Гэтэл М.Алгирмаа нь намайг  шүүхэд өгсөн байна.

- Яагаад?
- Шүүхэд өгч надаас 4.9 сая төгрөг нэхэмжилжээ.  33 дугаар байрны оршин суугч би энэ мөнгийг ганцаараа  төлөх үндэслэлгүй. Тэгээд ч оршин суух нийтийн эзэмшлийн газрынхаа төлөө, Монгол Улсын Үндсэн хуулийн амьд явах, нар харах эрхийнхээ төлөө  тэмцсэн иргэдээс шүүхэд өгч цагдаад дуудагдаж байгааг эсэргүүцэж байна. Харин ч иргэд бид  сэтгэл санаа, эрүүл мэнд, оршин суух тав тух, дайны байдалд байгаа мэт харуул манаа хамгаалалтын айдас хүйдэс дор байж хохирсон. Бүхэл бүтэн хоёр байрны оршин суугчдаас  намайг сонгож мөнгө нэхэмжлэх нь утгагүй хэрэг. Амгалан тайван амьдарч байсан 32 дугаар байрны 360,  33 дугаар байрны 432 өрхийн мянга мянган иргэд бид ямар ч төлбөр төлөхгүй бөгөөд газрын дуудлага худалдаанд өгсөн газраа өндөр үнээр худалдан авсны төлбөрөө энгийн иргэд биднээс биш иргэдээсээ асуудаггүй, иргэдээ хүндэлдэггүй, иргэдээ сонсдоггүй, газар олголт хийсэн Нийслэлийн газрын албанаасаа нэхэмжлэх хэрэгтэй. Шүүх мэргэн шийдвэр гаргаж иргэдийнхээ талд шийднэ гэж найдаж байгаа.