Анх 2007 онд суурийн шаваа тавьж байсан Яармагийн дэнж дээр сүндэрлэн баригдсан спорт цогцолбор өнөөдөр үүд хаалгаа нээлээ. Ингэснээр Монголдоо анх удаа 5045 хүний суудалтай ОУ-ын стандартад нийцсэн томоохон спорт цогцолбор болж байна. Энэ бүтээн байгуулалтыг урд хөршийн засгийн газрын буцалтгүй тусламжаал хоёр орны Засгийн газрын хооронд байгуулсаг гэрээний дагуу хятадын Шанхай группын ажилтнууд барьж гүйцэтгэсэн юм. Манай талд спортын ордныг хүлээлгэн өгөх арга хэмжээнд МУ-ын Ерөнхий сайд С.Батболд, Сангийн сайд С.Баярцогт, Эрүүл мэндийн сайд С.Ламбаа, МҮОХ-ны ерөнхийлөгч Д.Загдсүрэн, БТСГ-ын дарга Ч.Наранбаатар, үе үеийн спортын алдартнууд, амжилтын буухиа тамирчид оролцлоо. Шинэ спортын ордны тоглолт явуулах гол талбайн хэмжээ нь 2950 кв.метр байгаагаас гадна 260 кв.метр бэлтгэлийн хоёр жижиг заал болон нийт 104 өрөө тасалгаатай юм.

Үүнд албан тасалгааны болон аж ахуйн зориулалтаар ашиглах 32, нийтийн бие засах 35, спортын уралдаан тэмцээн зохион байгуулах мөн хэвлэл мэдээллийн 3, тусгай зориулалт болон техникийн 37 өрөө багтаж байгаа юм байна. Энэ ордонд спортын тэмцээн уралдаан зохион байгуулахаас гадна урлаг соёлын томоохон арга хэмжээ зохин байгуулах боломжтой юм. Харин МУ-ын Засгийн газрын 2010.11.23-ны өдрийн хуралдаанаас Хятадын Засгийн газрын буцалтгүй тусламжаар барьж байгуулсан энэ спортын ордны барилгыг төрийн өмчид бүртгэж, БТСГ-ын харъяанд шилжүүлэхээр тэмдэглэсэн бөгөөд засгийн газрын хэгэржүүлэгч агентлаг БТСГ нь спортын шинэ ордны үйл ажиллагааг удирдан явуулах юм байна.