Улс орон хөгжиж, тэнгэр баганадсан барилгууд ар араасаа сүндэрлэн боссоор байна. Нөгөө талаас хөдөөгөөс хотруу зорих их нүүдэл үргэлжилсээр. Орон сууцанд шинээр орж байгаа айлын хүүхдүүд, хотын захын гэр хороололд буусан айлын хүүхдүүд аль аль нь сургууль цэцэрлэгээс хол, иргэд нь эмнэлгийн тусламж үйлчилгээ авч чадахгүйд хүрээд байгаа сөрөг нөлөөтэй. Хэдхэн жилийн өмнө 22 мянган амтай байсан баянзүрх дүүргийн 4-р хороонд гэхэд сургууль, цэцэрлэг нэг ч байхгүй байхад 1500 хүн амтай суманд хоёр цэцэрлэг байх жишээтэй. Энэ мэтчилэнгээр сургууль цэцэрлэг, эмнэлэг түргэн тусламж, гал унтраах ангиудын тоо өсөөгүй, хуучин байрандаа цөөхүүлээ сууж байхад нийслэлийн иргэдийн тоо 1 сая 150 мянгад хүрээд байна. Өнөөдөр нийслэл хотод 48 сургууль, 31 цэцэрлэг барих зайлшгүй шаардлага үүсээд байгаа.

Тиймээс НБХБТГазар Эрин интернешнл, Олимп, Зайсан, Дүнжингарав хороолол, Номин констракшний удирдлагуудыг урьж Нийслэлийн Засаг дарга бөгөөд Улаанбаатар хотын захирагч Г. Мөнхбаяртай уулзалт зохион байгууллаа. Уулзалтын үеэр ирэх онд баригдахаар яригдаж байгаа 14 сургууль, 22 цэцэрлэгийн барилгын ажлын хөрөнгийн эх үүсвэрийг дан ганц улсын болон нийслэлийн төсөв хараад суулгүй хувийн хэвшлийнхэн өөрсдөө барих бүрэн боломжтой. Хамгийн гол нь хот газрыг нь шийдээд орон сууцны хороолол барьж байгаа компаниуд үүргээ биелүүлж сургууль, цэцэрлэг, эмнэлгийг барьж байгуулж өгөх үүрэгтэй. Мөн Концепцийн хууль бүрэн биелэлээ олбол төр, хотын хөрөнгө оруулалтаар бүх зүйлийг шийдвэрлэхийг хүлээх бус эргэн төлөгдөх нөхцөл буюу барьсан хойно нь мөнгийг нь гаргаж өгдөг, эсвэл барьж байгуулсан компани нь бүрэн хариуцдаг системд шилжих юм. Орон сууцны хороолол барьж байгаа компаниуд сургууль цэцэрлэгээ ч хамтад нь шийдвэрлэх ёстой хэмээн хотын дарга онцоллоо. Барилгын компаниудын удирдлагууд “Нийслэл бидэнтэй хамтран ажиллая гэсэн санаа гаргаж байгаа нь үнэхээр сайшаалтай байна. Хувийн хэвшлийнхэн бид та бүхэнтэй хамтран ажиллахад татгалзах зүйл огт байхгүй” гэдгээ илэрхийлж байлаа.