Сүүлийн жилүүдэд Улаанбаатар хотод баригдаж буй орон сууцны хорооллуудад хот төлөвлөлтийн бодлого алдагдсаар ирсэн. Тиймээс энэ гажуудлыг засаж, тэнд оршин сууж буй иргэдэд үзүүлэх нийгмийн үйлчилгээг нэгэнт баригдсан хорооллуудад боломжтой төлөвлөлт гарган нөхөн бий болгох, харин шинээр барьж эхлэх хорооллуудад энэ талын бодлогыг чанд мөрдүүлж ажиллах болно гэдгээ хотын мэр Г.Мөнхбаяр мэдэгдлээ.

Тэрбээр нийслэлд барилгын салбарт үйл ажиллагаа эрхэлж буй компаниудын төлөөлөлтэй уулзах үеэрээ энэ тухай анхааруулаад, “Улаанбаатар хотоос газар аваад, хотын дэмжлэгээр үйл ажиллагаа явуулж буй барилгын компаниуд  хот байгуулалтад тавигдах, хот төлөвлөлтийн шаардлагыг орхигдуулсаар иржээ. Шинээр хорооллууд баригдаад байгаа хэдий ч тэнд шинээр баригдсан сургууль, эмнэлэг, цэцэрлэг, гал команд алга. Энхтайвны гүүрнээс урагш олон сайхан хороолол баригдлаа. Гэтэл нийгмийн үйлчилгээгээ дагаад өглөөд нь Энхтайвны гүүрнээс хойшоо, оройд нь урагш тэмүүлсэн урсгал улам өргөжсөөр байна. Тиймээс бид хамтдаа энэ байдлыг засч залруулан, цаашид нийгмийн үйлчилгээг орхигдуулсан гажуудлыг засч ажиллана” хэмээн онцолсон байна.

Нийслэл Улаанбаатар хотын 470 мянган га газар нутгийн 27680 га нь барилгажсан талбай. Нийслэлийн хүн амын  41,5 хувь нь инженерийн  бүрэн хангамжтай нийтийн зориулалтын орон сууцанд амьдардаг бол үлдсэн хувь нь гэр хороолын иргэд байна. Улаанбаатар хотод нийт 94 мянга орчим барилга, байгууламж бүртгэгдсэн байдгийн 2378 нь нийтийн орон сууц, 74192 нь гэр хороолол болон зуслангийн байшин, 10725 нь үйлдвэрлэл, үйлчилгээний зориулалттай барилга, 975 нь цэцэрлэг, сургуулийн барилга байгаа юм. Нийслэлийн Барилга, хот байгуулалт, төлөвлөлтийн газраас хийсэн судалгаагаар Улаанбаатар хот болон алслагдсан дүүргүүдэд одоо байгаагаас гадна ерөнхий боловсролын сургууль 48, цэцэрлэг 31 байх шаардлагатай гэсэн тооцоо гарчээ. Хотын даргын өгсөн чиглэлийн дагуу тус газраас судалгаа хийж, одоогоор баригдаж буй орон сууцны хорооллын 27-н байршилд сургууль, цэцэрлэг байхаас эхний ээлжинд 8-н байршилд 14 сургууль, 22 цэцэрлэг шинээр бариулахаар  холбогдох компаниудтай хамтран төлөвлөлтийг нь гаргаад байгаа аж.

Ц.Батука