Өчигдөр Улаанбаатар хотыг дахин хөгжүүлэх хуулийн төслийн талаарх хэлэлцүүлэг Хангарьд ордонд болов. Төслийг санаачлагч "JAICA" Олон улсын байгууллагаас гадна энэ удаагийн төслийн хэлэлцүүлэгт Зам тээвэр барилга хот байгуулалтын яам, Газрын кадастрын алба болон холбогдох агентлагууд оролцсон юм. Улаанбаатар хотод барилга байгууламж шинээр барихад газрын асуудал мөнхийн маргаан дэгдээж бас хотынхны толгойны өвчин болсоор ирсэн. Тэгвэл өдгөө УИХ-аар Орон сууцны тухай хуулийн төслийг хэлэлцэж, Газрын тухай хуулийг Газрын кадастрын алба өргөн мэдүүлэх гэж байна. Мөн газрын төлбөрийн тухай, кадастрын зураг төслийн тухай хуулийн шинэчилсэн найруулгийг УИХ-ын хуралдаанаар хэлэлцэхээр төлөвлөжээ.

Засгийн газар орон сууцжуулах томоохон төслийн газрыг "нөөц газар" гэж үзээд сонгон шалгаруулдаг байсан бол цаг үрсэн энэ ажлыг хийхээ больж шууд олгож байхаар болсон. Харин томоохон чухал төслийн хэрэгжилтэнд Засгийн газар аргачлал гаргахаар болсон байна. Газрын нөхөн олговрыг улсын тусгай хэрэгцээнд орсон тохиолдолд олгож байхаар болжээ. Засгийн газар газрын суурь үнийг зах зээлийн бодит үнээр үнэлж байхаар болж зах зээлийн үнээс хамаараад нэгээс таван жилд дахин үнэлэхээр зааж өгсөн. Газрын кадастрын зургийг том маштабаар хийж нийслэл, аймгуудын төр захиргааны байгууллагад байршуулах төслийг Газрын кадастрын алба боловсруулсан байна.

Мөн уг төслийн хүрээнд Засгийн газар, газрын үнэлгээнд газрын чанар, чадавхи, төлөв байдал, эдийн засгийн өгөөжийг тус тусад нь хэлэлцсэн аж. Хөрс ургамал, газар хөдлөлтийн бүс мөн үү,
биш үү гэдгээс эхлээд газар доорх ус, ашигт малтмал зэрэг бүхий л зүйлийг тусгасан гэнэ. Газрыг үнэлэхдээ сум дүүргийн Газрын алба иргэдээсээ авч аймаг нийслэлдээ өргөсний дараа дүн шинжилгээ хийсний дараа төр захиргааны байгууллага авч хэлэлцэн шийдэх гэнэ.

Кадастрын хуульд энэ тухай оруулсан ба УИХ-аар эцсийн байдлаар өргөн барьсны дараа тодорхой үзэж болох юм байна. 2008 онд хот байгуулалтын хуульд шинэчилсэн найруулга хийж баталсан. Уг хуульд шинэчлэл хийснээс хойш бүтэн хоёр жил хэрэгжиж байна. Амьдрал дээр уг хуулийн хэрэгжилт алдаа дутагдалтай байжээ гэдэг нь хэдийнээ нотлогдчихоод байгаа. Тиймээс шинэчилсэн найруулга хийхээр болсон. Зам тээвэр, барилга хот байгуулалтын яамны зүгээс хэрэгжүүлэгч агентлагт бодлого чиглэлийн зөвлөмж өгч байгаа аж.

Зам тээвэр, барилга хот байгуулалтын сайдын тушаалаар хоёр дүрэм батлаад байгаа ба дахин шинээр гурван дүрэм батлагдах шатандаа яваа ажээ. Мөн хэд хэдэн дүрэм боловсруулалтын шатандаа явж байгаа юм байна. Агентлагын зүгээс орон сууц барилга хот байгуулалтын хуульд заавал нэмэлт өөрчлөлт оруулах талаар Зам тээвэр барилга хот байгуулалтын сайдад мэдүүлжээ.

Уг хуульд зайлшгүй орох ёстой кадастрын нэр томъёо орхигдсон байдаг. 2010 онд УИХ-аар хэлэлцүүлсэн орон сууцны үзэл баримтлалаар инженерийн шугам сүлжээг төлөвлөсөн байна. Орон сууцны шугам сүлжээ инженерийн байгууламжинд орсон өртөгийг барихад зарцуулсан хөрөнгөнд оруулж тооцохыг хориглосон. Орон сууцны хуулинд барилга барихаас гадна ашиглалт, хамгаалалт, эргэх засварын талаар тусгах тухай ч энэ удаагийн төслийн талаарх хэлэлцүүлэгийн үеэр хөндөн ярилцсан юм.