Нийслэлд өвөл байтугай зуны цагт хүүхэд залуус чөлөөт цагаа өнгөрөөх газар байдаггүй гэхэд болно. Өвлийн улиралд хэдэн мөсөн гулгуурын талбай ажиллахаас өөр амралт чөлөөт цагаа өнгөрүүлэх газар байдаггүй.

Харин ирэх жилээс зургаан дүүрэгт усан бассейн барих тухай яригдаж байна. Энэ талаар Нийслэлийн хөрөнгө оруулалтын газрын Зураг төслийн мэргэжилтэн Э.Ариуннямаас тодрууллаа.

Ирэх жил зургаан дүүрэгт усан бассейн барихаар төлөвлөсөн гэсэн. Энэ талаар тодруулах гэсэн юм?
Нийслэлийн Засаг даргын 2009-2012 оны үйл ажиллагааны мөрийн хөтөлбөрт туссан хөтөлбөрийн дагуу нийслэлийн зургаан дүүрэгт усан бассейн бүхий 1000 хүний суудалтай спорт цогцолбор барихаар болсон.

Хаана, хаана барих юм бэ. Мөн газрын асуудлыг хэрхэн шийдсэн юм бол?
Ордон баригдах газар нь шийдэгдсэн байгаа. Баянгол, Баянзүрх, Хан-Уул, Чингэлтэй, Налайх, Сүхбаатар дүүргүүдэд барих юм.

Барилгын ажил хэзээ эхлэх вэ?
Одоогоор зураг төсөл нь хийгдэж байна. Зураг төсөл дууссаны дараа барилгын ажил эхлэх байх.

Хөрөнгө оруулалт нь шийдэгдсэн үү?
Дүүрэг бүрт олгосон газраас хамаарч зураг төсөл гарна. Эдгээр зургаан ордон бүгд 1000 хүний суудалтай ч газраасаа хамаарч том жижиг баригдана. Түүнийхээ хэмжээгээр барилгын төсөв хөрөнгө нь батлагдах юм. Ирэх жилээс зураг төсөл бэлэн болсны дараа төсөвт суулгах талаар яригдах байх. Зураг гарч байж төсөв гарна.

Э.Пагмадулам