МХЕГ-аас хийсэн шал­галтаар 1970-аад онд ашиглалтанд орсон сургуулийн 29, цэцэрлэгийн 51 барилга газар хөдлөлтийн үед нурах эрсдэлтэй, найдваргүй гэсэн дүгнэлт гарсан байна.

Дэнжийн мянгын цагаан байрнуудын дунд байрлах 1955 онд орон сууцны зориулалтаар ашиглалтад орсон барилгад одоо 31 дүгээр цэцэрлэг байрлаж, 100 гаруй хүүхэд хүмүүждэг. Зориулалтын бус тус барилгад жил бүр нуралт үүсч байгаа ч дөрвөн хорооны дундах хоёрхон цэцэрлэгийн нэг учир хүүхдүүд авч, үйл ажиллагаа явуулсаар байна. Өнгөрсөн жил ОБЕГ болон МХЕГ-аас тус барилгад “Хүн амьдарч болохгүй” гэж дүгнэн, акт тогтоосон ч хаалгаа бариагүй байгаа юм. Энэ мэт нийслэлд 1960-70-аад онд баригдсан барилгад цэцэрлэг, сургууль ажиллаж байгаа нь олон байна. Шалгалтаар 1970-аад онд баригдсан газар хөдлөлтөд тэсвэрлэхгүй 80 гаруй сургууль, цэцэрлэгийн найдваргүй, нурах эрсдэлтэй барилга тогтоогдсноос наймыг нь бүр мөсөн хаажээ.

Улсын төсвийн 20-30 хувь боловсролын салбарт ноогдож, өнгөрсөн жилд гэхэд 40 гаруй сая төгрөгийг БСШУ-ны сайдын багцад суулгасан ч яамнаас уг хөрөнгийг чамлаж буцаажээ.   Тодруулбал, яс муудсан барилгыг гаднаас нь өнгөлөн шавардаж, хий дэмий мөнгө үрсэнээс нэг мөсөн нураагаад, оронд нь шинийг баривал илүү үр дүнтэй гэж мэргэжилтнүүд үзжээ.

Нийслэлийн хэмжээнд 48 сургууль, 31 цэцэрлэгийг шинээр барих нэн шаардлагатай байгаа ч одоогоор ажил эхлээгүй байна.
Д.Сувд