Нийслэлийн Мэргэжлийн хяналтын газрын даргын захирамжаар “Төрийн өмчийн сургууль, цэцэрлэгийн барилга байгууламжийн ашиглалтын байдалд хийгдэх нэгдсэн шалгалт”-ыг нийслэлийн есөн дүүргийн нутаг дэвсгэрт байрлах ерөнхий боловсролын 110 сургуулийн 128 барилга, 160 цэцэрлэгийн 169 барилга, хүнсний материал, бүтээгдэхүүн нийлүүлдэг хангамжийн гурван төвийн зургаа, Сонгинохайрхан дүүргийн 21 дүгээр хороо “Жаргалант” тосгонд байрлах 74 дүгээр сургуулийн 80 хүүхдийн дотуур байр, тэдгээрийн гадна, дотор инженерийн шугам сүлжээний чанар, ашиглалт, аюулгүй байдалд хийжээ.

Шалгалтаар есөн дүүргийн 88 сургууль, 124 цэцэрлэг инженерийн хийцтэй төлөвлөгдсөн бөгөөд 1970 оноос өмнө ашиглалтад орсон 27 сургуулийн 29 барилга, 51 цэцэрлэг чулуун өрлөгт ба цутгамал бетон шугаман суурьтай тул суулт, хагарал үүссэн, цаашид ашиглах боломжгүй гэдгийг тогтоожээ. Тиймээс дээрх барилгуудыг буулгах шийдвэр гаргасан байна.

Ирэх онд нийслэлд 100 объект барина

Нийслэлийн 2011 оны нийгэм, эдийн засгийн зорилт, төсвийн талаарх мэдээллийг өчигдөр ЗДТГ, Улаанбаатар хотын Захи - рагчийн ажлын албанаас мэдээлэв. Ирэх жил нийслэлд төсвийн хөрөнгө оруулалтаар хорооны цогцолбор, сургууль, цэцэрлэг, эмнэлгийн өргөтгөл зэрэг 61 объект барихаар төлөвлөсөн бөгөөд эргэн төлөгдөх нөхцөлөөр 39-ийг нэмж барихыг НИТХ-аар хэлэлцүүлэхээр төлөвлөжээ.

Түүнчлэн иргэдийн ая тухтай ажиллаж, амьдрах нөхцөлийг бүрдүүлэх үүднээс есөн дүүрэг тус бүрт нэг тэрбум төгрөгийн хөрөнгө оруулалт хийж, ногоон төгөл, усан сан байгуулах юм байна. УИХ-аар хотын төсвийг батлахдаа нийслэлийн төсвийн нэлээдгүй хэсгийг зарцуулдаг оюутан, өндөр настан, хөгжлийн бэрхшээлтэй иргэдийн нийтийн тээврээр зорчиход үзүүлдэг хөнгөлөлтийн 50 хувийг улсын төсөвт төвлөрүүлэх болсон тул энэ мөнгөөр нийслэлд олон ажил хийх боломж бүрдэж буй юм.

Нийслэлийн иргэдийн хурлын төлөөлөгчид энэ сарын 24-нд хуралдаж, ирэх оны нийслэлийн төсвийг батална. Улаанбаатар хотод хийх бүтээн бай гуу - лалтын ажлыг батлах энэхүү хуралдааны өмнө буюу ирэх долоо хоногт НИТХ-ын байнгын хороод хуралдаж, ирэх оны төсвийн төслийг хэлэлцэж эхлэх юм байна.