Хаа сайгүй л замын хөдөлгөөн хаачихсан, жолооч, зорчигчдын бухимдлыг төрүүлж байгаа.Нийслэлийн хэдхэн гол замуудыг энэ зунжин засч байна, сайжруулж байна гэсээр намрын дунд сартай золголоо. Ажил хэр урагштай явааг надаар хэлүүлэлтгүй нийслэлийнхэн сайн мэднэ. Аль зургадугаар сард эхэлсэн XXI хорооллын зам засварын ажил өдгөө ч дуусаагүй, нийслэлийн зам, гудамж талбай ундуй сундуй хэвээрээ л байна. Гэтэл одоо хүртэл засварын ажил сунжирсаар байна. Түүнчлэн Төмөрчний гудамж буюу бидний нэрлэдгээр “Бөмбөгөр”-ийн урд талын замыг засах ажил ч Хүүхдийн баяртай зэрэгцэн эхэлжээ. Төмөрчний гудамжны замыг засах, 25 дугаар коллекторыг барих гүйцэтгэгчээр “Тэнгэр уул”, “Мон агаар”, “Наран тойром” зэрэг нэлээд хэдэн компани шалгарсан юм байх. 400-хан метр замыг засахын тулд ийм олон компани байх хэрэгтэй ч юм уу, үгүй ч юм уу. Олдохоор өлдөнө гэгчээр бие биедээ найдсаар өдийг хүрсэн нь ойлгомжтой. Эдгээр компаниуд зөвхөн зам засварынх гэж байгаа. Цаана нь энэ замд гэрлийн шон суулгах, явган хүний зам тавих компани гээд иймхэн замын засварыг арваад компани гүйцэтгэж байгаа. “Мон агаар” компанийнхан болохоор “Бид зөвхөн замын хучилтыг л хийх ёстой.
25 дугаар коллекторын ажлыг дууссаны дараа “Тэнгэр уул”-ынхан замыг хуучин янзанд нь оруулах ёстой. Тэднийг л хүлээгээд байна” гэдэг. Харин “Тэнгэр уул”-ынхан нь болохоор “Манайх зөвхөн туслан гүйцэтгэгч. “Мон araap'’-ынхантай хамтран гүйцэтгэх ёстой” гээд бие биеэ хүлээсээр, нэг нэг рүүгээ түлхсээр байгаа. Тэгсэн мөртлөө энэ долоо хоногт Төмөрчний гудамжны зам ашиглалтад орчихно гэх юм. Ёстой лөөлөө биз дээ. Зуны гурван сард хийж чадаагүй ажлаа гурав дөрөвхөн хоногт гүйцээчихнэ гэдэг юу л бол. Замын ажил гэдэг тийм амархан ажил биш. Хөрс хуулахаас эхлээд ажил бишгүй гэж албаны хүмүүс тайлбарладаг. Юу юугүй өвөл хаяанд ирчихлээ. Ноднин өдийд эхэлсэн зам засварын ажил өвөлтэй зэрэгцэж дууссан. Үр дүн нь ямар байдгийг “Чингис” зочид буудлын зүүн талын зам бэлхнээ харуулсан. Дүн өвлөөр зассан зам урь унаж, газар гэсүүт хагарч, энд тэндээ цөмөрч, жолооч нарыг багагүй сандаргаж, дахин засч сайжруулах гэж багагүй хөрөнгө зарсан. Хэдхэн хоногийн өмнөөс Тасганы овооноос Зурагтын гэр хороолол хүрэх 2.5 км урттай замыг засч эхэлсэн. Аравдугаар сарын 10 гэхэд энэ чиглэлийнхэн шинэ замаар зорчиж эхэлнэ. Тэр болтол cap гаруй хугацаа байна. Хугацаандаа дуусах болтугай л гэж залбирахаас. Уржигдраас эхлэн IV дэлгүүрийн өмнөх замыг хаачихаж. Бас л замыг нь засч байгаа юм байх.