Баянгол дүүргийн нутаг, “ТБД-Андууд” худалдааны төвийн хойно барьж буй орон сууцны барилгад энэ сарын 06-ны өдөр гал гарсан. “Эко констракшн” компанийн бариулж буй уг барилгад юунаас болж гал гарсныг барилгачдаас нь тодруулахад “Манай зарим ажилтан гагнуур хийсэн. Энэ үед хураалттай хөөсөнцөрт оч үсэрч гал авалцсан. Барилгад гал гараагүй шүү дээ. Дулаалгад ашиглах зорилготой нэлээд их хэмжээний хөөсөнцөр авчирсан байсан нь шатлаа. Ажилчдын хайхрамжгүй байдлаас боллоо” гэж байсан.

Ер нь манай барилгуудад дулаалгын үндсэн материал болгож хөөсөнцөр хэрэглэж байгаа. Барилгын мэргэжлийн хүмүүсээс тодруулахад хөөсөнцөр хэрэглэж болно. Гэхдээ аюулгүй байдлаа бодож хэрэглэх нь зөв юм гэсэн саналыг хэлж байна. Өнөө үед АНУ-д, манай урд хөршид ч тэр полистирол /химийн нийлэг нэгдэл/ буюу хөөсөнцөр хавтанг үйлдвэрлэхдээ шаталт үүсгэдэггүй тусгай бодис нэмж үйлдвэрлэж байгаа аж.

Харин манайд хямдчилж чанар муутай хөөсөнцөр барилгад ашиглаж буйгаас болж гал алдан эгээтэй л эрдэнэт хүний амь зулын гол, барьж буй барилга нь “Бөмбөгөр” болчихсонгүй. Бас чанар, нягтшил муутай хөөсөнцөр тарж бутарна. Энд тэнд бөөн хог болж хийснэ гээд л чанар муугийн зовлон мундахгүй. Энэ бүхэн дээр анхаарч ажиллахгүй бол хүний амь нас, эд хөрөнгө хохирч үлдэхгүй байхын баталгаа Улаанбаатар хотод баригдаж байгаа барилгуудад байхгүй байна. Хариуцлага гэдэг зүйлийг бодож барилгаа дулаалах материалаа сонгох нь зүйд нийцэх биз ээ.