Бээжингийн зуны олимп нээгдэх хүртэл жил хүрэхгүй хугацаа үлджээ. Олимпийн тоглолтын гол барилга байгууламж болох Olympic Green and Forest Park дуусах шатныхаа ажилд оржээ. Olympic Green нь Бээжингийн төв зам дагуу хойноос урагш сунаж тогтсон нийтдээ 1135 га талбай эзлэн орших аж. Энэ цэцэрлэгт хүрээлэн нь Олимпийн стадион болон үндэсний усанд сэлэлтийн төв зэрэг 13 объектыг багтаасан Олимпийн их наадмын гол “зүрх” болно.
Тус цогцолборын зураг төслийг хийж, баригдах газрыг нь өөрчлөх төлөвлөгөөг боловсруулсан Америкийн Sasaki Associates компани олимпийн тоглолт буюу түүнтэй төстэй хэмжээний томоохон тэмцээнүүдийг зохион байгуулж байсан хотуудын өмнө үүсдэг асуудлыг шийдвэрлэхэд онцгой анхаарал хандуулсан байна. өөрөөр хэлбэл, олимпийн тоглолт дууссаны дараа барьж байгуулсан барилга байгууламжууд болоод газрыг нь хэрхэн оновчтой ашиглах тал дээр анхаарал хандуулжээ.
Sasaki Associates олимпийн тоглолт болох газрыг өөрчлөн байгуулах ерөнхий төлөвлөгөөг хийх олон улсын уралдаанд шалгарсан аж. Төслийн бусад компаниудын санал нь тухайн газар нутгийг нь өөрчлөх замаар шинэ барилга байгууламж, архитектур хийцийг гаргахтай уялдаж байсан. Тухайлбал, Олимпийн цэнгэлдэх байгуулах газарт байрлаж байсан Мин улсын үеийн Nang, Олимпийн хотхоны хойд хэсэгт 350 жилийн турш сүндэрлэсэн Dragon King хэмээх соёлын өв болсон сүмүүдийг буулгах талаар дурьдсан байжээ. Зөвхөн цэцэрлэгт хүрээлэнгийн нутаг дэвсгэр нь 680 га талбай эзлэж байгаа бөгөөд олимп дууссаны дараа Бээжингийн иргэдийн амрах гол газар хэвээр байх юм. Олимпийн тосгоны 360 мянган м2 байрыг тоглолт дууссаны дараа орон сууцны зориулалтаар худалдах гэнэ.