Яармагийн дэнж нийслэлийн шинэ өнгө төрхийг тодорхойлно. БНСУ-ын "ВКВ" групп "Яармаг шинэ хот"-ыг сүндэрлүүлэх төлөвлөлтийг хийлээ. Мөн Буянт-Ухаагийн орчимд орон сууцны хороолол барих шавийг тавьсан билээ.  "Яармаг шинэ хот", "Буянт-Ухаа" орон сууцны хороолол хэзээ баригдаж эхлэхийг сонирхолоо.

"Яармаг шинэ хот" баригдах, үгүй нь УИХ-ын шийдвэрээс шалтгаална
Нийслэлийн Хот твлөвлөлт, эрдэм шинжилгээ, зураг төслийн хүрээлэн, БНСУ-ын "ВКВ" групп хамтран Яармагийн дэнжид "Яармаг шинэ хот" байгуулах төслийг боловсруулсан билээ. Солонгосын "ВКВ" групп төслийг санхүүжүүлнэ. Зөвхөн дэд бүтцийг байгуулахад л 200 гаруй сая ам доллар зарцуулах юм байна. Зураг төсөл, хөрөнгө мөнгө нь тодорхой болчихоод байхад уг төсөл өнөөг хүртэл эхлэхгүй байгаа нь хэд хэдэн шалтгаантай аж. "Яармаг шинэ хот" төслийг хэрэгжүүлэхийн тулд дархан цаазат Богдхан уулын эзэмшил нутгаас 470 га газрыг авах хэрэгтэй болжээ. УИХ-ын Байгаль орчин, хүнс, хөдөө аж ахуйн байнгын хороонд газрын асуудлыг шийдэж өгөх саналыг тавиад байна. Мөн төслийг хэрэгжүүлэх саналыг хотын даргад уламжилсан бөгөөд нийслэлийн Засаг дарга ойрын хугацаанд захирамж гаргахаар төлөвлөж буй гэнэ.
"Буянт-Ухаа" хороолол ирэх онд баригдаж эхлэх нь
“40 мянган орон сууц” хөтөлбөрт жинтэй хувь нэмэр оруулах "Буянт-Ухаа" орон сууцны хорооллын шав тавих ёслол энэ оны тавдугаар сард болж төр засгийн тэргүүнүүд оролцсон билээ. "Буянт-Ухаа" орон сууцны хорооллын инженерийн шугам сүлжээний зураг төслийг боловсруулах тендерийг зарлаж, гүйцэтгэгч компаниудыг нь шалгаруулжээ. Дулааны шугам сүлжээний зураг төслийг "Од төсөл", цэвэр, бохир усны шугамын зураг төслийг "Инж" компани хийж байна. Орон сууцны хорооллын цэвэр усны нөөцийг тогтоох судалгааг хийж байгаа аж. Ирэх оны төсөвт хорооллыг барих санхүүжилтийг тусгах юм байна.

"ТЭЦ-IV" "Буянт-Ухаа" хорооллыг дулаанаар хангана

"Буянт-Ухаа" орон сууцны хорооллын төлөвлөлтийн талаар нийслэлийн Барилга хот байгуулалт, төлөвлөлтийн газрын Хот байгуулалтын хэлтсийн инженер, эдийн засагч П.Батчимэгээс тодрууллаа.

-"Буянт-Ухаа", "Яармаг шинэ хот"-ыг нэг хороолол гэж эндүүрэх явдал байна?
-"Буянт-Ухаа" орон сууцны хороолол нь "Яармаг шинэ хот"-ын баруун талд сүндэрлэнэ. Тодруулж хэлбэл, Хан-Уул дүүргийн аравдугаар хороо, Яармаг, Буянт-Ухаагийн авто замын хойд тал, Иргэний нисэхийн ерөнхий газрын баруун тал, Улаанбаатар Төв аймгийн авто замын зүүн талд баригдах юм. Нийт 170 га газар нутгийг хамарна. Улаанбаатар хотыг 2020 он хүртэл хөгжүүлэх ерөнхий төлөвлөгөөг хэрэгжүүлэх ажлын хүрээнд тус газарт инженерийн нэгдсэн шугам сүлжээнд холбогдсон, орчин үеийн 3-18 давхар барилгатай орон сууцны хороолол баригдах юм.

-Ирэх онд баригдаж эхлэх юм билээ. Хэдийд ашиглалтад орох вэ?
-2015 онд барьж дуусгахаар төлөвлөгдсөн. 10 мянган өрхийн 40 мянган хүн ам амьдарна. Мөн 7500 хүүхдийн багтаамжтай сургууль, 3750 хүүхэд хүмүү-жих цэцэрлэг байгуулна. Мэдээж худалдаа үйлчилгээ, соёлын газрыг ч төлөвлөсөн.

-Хамгийн хэцүү асуудлын нэг нь тэнд дэд бүтцийн хангамж байхгүй. Үүнийг хэрхэн төлөвлөж өгөв?
-Дулааныг "ТЭЦ-IV"-өөс хангах юм. Мөн Нисэхийн орчмыг дулаанаар хангаж байгаа есдүгээр магистрал шугамыг өргөтгөнө. "Улаанбаатар хотын дулааны шинэ эх үүсгүүр сонгох, үндэслэл боловсруулах" судалгааны багийн хийсэн дүгнэлтээр тус хорооллын дулааныг "ТЭЦ-IV" -өөс нийлүүлэх бүрэн боломжтой гэж үзсэн. Дулаан хангамжид нийт 9.046 тэрбум төгрөг зарцуулна. Одоо байгаа Нисэхийн хороолол нь усан хангамж, ариутгах татуургын бие даасан системтэй. Гүний дөрвөн худагтай. Хоногт 2000 шоо метр ус олборлож байна. Шинэ хороолол баригдснаар хоногт 11250 шоо метр ус олборлох шаардлагатай болно. Цэвэр усны хангамжийг нэмэгдүүлэхэд 1.76 тэрбум төгрөг тусгалаа. Цэвэрлэх байгууламжийг биологийн бүрэн цэвэрлэгээтэй байхаар төлөвлөлтөд тусгасан. Хүчин чадлын тухайд хоногт 12 мянган шоо метр бохир ус цэвэрлэх байгууламж хэрэгтэй бөгөөд эхний ээлжинд хоногт 6000 шоо метр бохир ус цэвэрлэх хүчин чадалтай байгууламж барина. Энэ ажилд 6.3 тэрбум төгрөг, цэвэр, бохир усны шугам сүлжээнд дөрвөн тэрбум төгрөг шаардлагатай. Цахилгааны тухайд Хан-Уул дүүргийн наймдугаар хорооны нутаг дэвсгэрт байрлах "Яармаг" станцыг өргөтгөнө. Мөн "Нисэх-35" өртөөний цахилгаан дамжуулах агаарын шугамыг кабелиар сольж, энэхүү өртөөтэй адил хүчин чадалтай өртөөг шинээр барих хэрэгтэй. Цахилгаан хангамжийн эх үүсвэр, шугам сүлжээнд нийт 6.681 тэрбум төгрөгийн хөрөнгө оруулалт хэрэгтэй байдаг.

-Олон улсын нисэх буудлын дэргэд байрлах хороолол учраас зам өндөр хөгжилтэй орны түвшинд хүрсэн байх ёстой. Энэ тал дээр...
-Хурдны зам тавигдана. Хурдны замууд нь гурав гурван урсгалтай, хоёр талдаа зогсох зурвастай байна. Мөн хороолол доторх замуудтай салбарлан холбогдоно. Авто зам барихад 6.3 тэрбум төгрөг шаардагдаж байгаа.

-Хорооллыг барих санхүүгийн асуудал хэрхэн шийдэгдэж байна вэ?
-Хорооллыг байгуулах тухай нийслэлийн Засаг даргын захирамж гарсан. Гадаад, дотоодын хөрөнгө оруулагч, барилгын компаниудтай гэрээ байгуулан ажиллаж байна.