Овгор, товгор, хонхор гүдгэр ихтэй болохоор жолооч нарын уран жолоодлого шаардсан зам болоод байна.
Ажлаа тараад гэр рүүгээ, гэрээсээ ажил руугаа явахад нэгэн бэрхшээл учрах боллоо. Энхэл, донхол, ухаж, төнхсөн замаас болж авто машины түгжрэл байнга үүснэ. Дээрээс нь аваар осол гарах аюул ихтэй болохоор тэр замаас болж, хамаг эд эс маань үхчихнэ. Ийм л зовлонг Сонгинохайрхан дүүргийнхэн эдлэх болсон. Сонгино хайрхан дүүргийн XXI хороолын зам жолооч, зорчигчдын хувьд “там” болсон гэхэд дэгсдэхгүй. Уг нь аль зургадугаар сараас л энэ замыг засч эхэлсэн. Хуулаад, ухаад л, засаад л байдаг. Ажил нь урагшилсан ч юмгүй, зам нь ашиглалтад орсон ч юмгүй нэлээд хугацааг үдлээ. Дээрх замыг долдугаар cap гэхэд ашиглалтад оруулна хэмээн “Нутгийн зам” компани үүрэг авсан гэдэг. Харамсалтай нь тус компанийн том амлалт талаар болжээ.
        Энэ зам ойрын хугацаанд ашиглалтад орж чадах эсэхэд олон ч хүн эргэлзэж байна. Холбогдох албаны хүмүүс энэ талаар тоймтой хариу хэлж чадахгүй байгаа. Зам засч буй ажилчид ч ажлаа хэзээ дуусахыг хэлж мэдэхгүй байна. Ажилчдынх нь ярьж буйгаар “Нутгийн зам” компанид есдүгээр сарын 1 гэхэд замыг ашиглалтад оруулсан байхыг Нийслэлийн авто замын газраас даалгасан. Хичээлийн шинэ жил эхлэхээр хөл хөдөлгөөн нэлээд ихсэх болохоор энэ замыг яаралтай засч дуусахгүй бол горьгүй гэдэг сануулгыг өгчээ. Харин ажил муутай, хэнэггүй нь дэндсэн “Нутгийн зам” компанийнхан дээрх шаардлагыг биелүүлж, хэлсэн хугацаанд ашиглалтад оруулж чадна гэхэд бэрхтэй. Өнөөдрийн байдлаар л гэхэд тус компани замынхаа 50 хувийгч засч янзлаагүй байгаа юм.
        Санхүүжилтгүйгээс зам засах ажил удааширч байна уу гэвэл бас үгүй ажээ. Холбогдох албаны хүмүүсийн хэлснээр бол зам засах ажилд төсөвлөгдсөн хөрөнгө, мөнгийг аль эрт шилжүүлсэн гэнэ. Тэгсэн атал зам яагаад засч дуусахгүй байгаа талаар тус компанийнхан олон шалтгаан, элдэв тайлбар хийж өөрсдийгөө хаацайлдаг бололтой. Өөрсдийнхөө бурууг “Нутгийн зам” компанийнхан тэнгэр хангай руу чихдэг гэнэ. Бороо орсноос болоод замын ажил удааширлаа хэмээн хариулдаг. Цаг хугацаандаа ажлаа амжуулаагүй энэ компанийн ажлыг эртхэн зогсоож хийж, засч додомдож чаддагт нь өгсөн бол өнөөдөр хаа, хаанаа бухимдаж, уурлахгүй л байсан биз. Жолооч нарын ярьж буйгаар тус компанийнхан энэ замыг маш муу засч байгаа гэнэ. Овгор, товгор, хонхор гүдгэр ихтэй болохоор жолооч нарын хувьд уран жолоодлого шаардсан зам болоод буй. Уг зам жилийн дараа гэхэд л хүний гар хүрэхээс өөр аргагүйд хүрнэ байхдаа. XXI дүгээр хорооллын замын засварын ажлыг гүйцэтгэж буй “Нутгийн зам” компанийнхан нэг иймэрхүү маягаар ажлаа хийж байна. Тэдний гурилдаад л өнгөрсөн ажлыг харин комисс хэрхэн дүгнэх бол.