Хятадын хөрөнгө оруулалттай тоосгоны болон оёдлын үйлдвэрүүдэд өнгөрөгч долдугаар сард Нийслэлийн мэргэжлийн хяналтын газраас шалгалт хийсэн байна. Тоосгоны үйлдвэрүүдэд ажиллаж байгаа монгол иргэдийн ахуй болон тэдний хөдөлмөрийн хуулийн хэрэгжилт, эрх нь зөрчигдсөн эсэх талаар шалгажээ. Нийслэлийн хэмжээнд үйл ажиллагаа явуулж буй оёдлын үйлдвэрүүдэд 500-600 эмэгтэй хөдөлмөрийн хуулинд заагдсанаас бага цалин авдаг юм байна. Оёдлын үйлдвэрүүдийн ихэнх нь БНХАУ-ын хөрөнгө оруулалттай, хятад эзэнтэй байдаг. Тэнд ажиллаж буй монгол эмэгтэйчүүд гурваас долоон төгрөгийн цалинтай дамжлага оёдол дээр ажиллаж өдөрт 1000-1500 төгрөг авдаг гэнэ. Оёдлын үйлдвэрүүдэд ажлын осол гэмтэл цөөнгүй гардаг аж. Тухайлбал, энэ сарын 18-ны өдөр Хан-Уул дүүргийн II хороонд байрлах "Яармаг" компанийн ажилчин 22 настай эмэгтэй Э уут оёгч машиныхаа тогонд цохиулж нас барсан золгүй явдал гарч байсан.

Харин тоосгоны үйлдвэрүүдэд хөдөлмөрийн хуулийн бүх заалт зөрчигддөг аж. Баянзүрх дүүргийн нутагт байрлах дөрвөн тоосгоны үйлдвэрээр ороход гурав нь хятад эзэнтэй байжээ. Тус үйлдвэрүүдэд голчлон 18-35 насны эрэгтэй хүмүүс ажиллаж байжээ. Үйлдвэрт ажиллаж буй хүмүүс Нүүрсний болон бусад хэлбэрийн тоосжилт ихтэй орчинд ажилладаг учир уушиг нь хэзээ ч эдгэрэхгүй өвчилдөг байна. Шалгалтын бүрэлдэхүүн "Тиан Ид Аа" ХХК-д ороход 68 ажилчин байснаас 40 нь БНХАУ-ын иргэн байжээ. Тэдний бичиг баримтыг шалгахад бизнес хийнэ гэсэн нэрээр орж ирсэн байсныг илрүүлжээ. Мөн ажилчид нь амны хамгаалалт, бээлий гэх зэрэг зайлшгүй хэрэглээний хангамжгүй байсан гэнэ.

Шалгалт хийсэн бүх компанийн техник хэрэгсэл нь ажилчдын аюулгүй нөхцөлийг бүрэн хангаагүй байж.Тиймээс зарим газруудын үйл ажиллагааг түр зогсоосон гэнэ. Нийслэлийн хэмжээнд  нийт  30  орчим тоосгоны үйлдвэр байдаг аж. Харин тэдний үйл ажиллагааг хянаж шалгах үүрэгтэй НМХГ-т долоон байцаагч ажилладаг байна. Тэд бүх тоосгоны үйлдвэрээр орж чаддаггүй хүн хүч дутмаг байдаг гэнэ. Харин цаана нь хууль бус үйл ажиллагаатай олон компани үйл ажиллагаагаа явуулсаар л байна. Хамгийн ноцтой нь иргэд өөрсдөө ажилд орохдоо амь нас, эрүүл мэндийн ямар ч гэрээ хийдэггүй гэнэ. Ажилд авч буй компани иргэдтэй амаар гэрээ байгуулдаг. Өөрөөр хэлбэл, амь насыг чинь хариуцахгүй шүү гэдэг аж. Уржигдар гэхэд Увс аймагт 17 настай эрэгтэй хүүхэд тоосго шахах машиндаа цохиулж амиа алдсан байна.

Өдрийн сонин