Хөдөөд "40 мянган орон сууц" ашиглалтад орж эхэллээ

Barilga
2019-11-05

Хөдөөд "40 мянган орон сууц" ашиглалтад орж эхэллээ

Засгийн газраас хэрэгжүүлж буй "40 мянган орон сууц" хөтөлбөрийн хүрээнд барьж буй орон сууц ашиглалтад орж эхэллээ гэсэн гэгээн мэдээ тарлаа. Хамгийн эхнийх нь Дорнод аймгийн Сэргэлэн суманд сарын өмнө ашиглалтад орсон бол Хөвсгөл, Говь-Алтай аймгийн хэд хэдэн сумын бага, дунд орлоготой иргэд, төрийн албан хаагчид саяхан шинэ байртай болов. Эдгээр нь дөрвөн айлын орон сууц.
Тэгвэл Сэлэнгэ аймгийн төвд барьж буй 40 айлын орон сууцыг барьж буй барилгачид дөрөвдүгээр давхраа өрж байна. Бусад аймгийн төвд барих орон сууцны суурийг тавьж, инженерийн шугам сүлжээ татаад эхэлжээ. "12 аймгийн төвд 20 айлын орон сууц барих тендерийг дүгнэж, шалгарсан компаниуд ажилдаа орсон байна. Улаанбаатарт барих барилгын бэлтгэл ажлын явц сайн байгаа гэнэ.

Орон сууцны санхүүжилтийн корпорацийн гүйцэтгэх захирал Ж.Жаргалсайханаас зарим зүйлийг тодрууллаа.

-"40 мянган орон сууц" хөтөлбөрийг хэрэгжүүлэх ажил аль шатандаа явж байна вэ?
-Ажил бидний төлөвлөсөн хэмжээнд явж байна. Орон сууцанд орох гэсэн 15000 орчим иргэний хүсэлтийг хүлээн авсан.

-Хүсэлтийг хэдий хүртэл хүлээж авах вэ?
-Хугацаа байхгүй. Хүсэлтийн маягтыг 50 мянган төгрөгөөр дамлан зарсан тохиолдол саяхан гарлаа. Орон сууцны зээлд хэрхэн хамрагдах талаар иргэд ойлголтгүй байна. Бид ч мэдээллээр хангаж чадаагүй буруутай.

-Хэчнээн хүний хүсэлтийг авах юм бэ?
-Үүнд хязгаар байхгүй. Энэ сар, жилд багтаж хүсэлт гаргах ёстой, төдөн хүнээс авна гэсэн хязгаар тогтоогоогүй. Орон сууцтай болох хүсэл айл бүрт бий. Нэг өрөөгөө хоёр, гурав болгох, өрх тусгаарлах гэх мэтээр орон сууцны хэрэгцээ их. Нэг орон сууцанд хоёр гурван өрх амьдарч байгаа тохиолдол байдаг. Иргэд хэдийд ч ирээд орон сууцны захиалга өгөх хүсэлтийн маягтыг бөглөх боломжтой. Ямар ч дараалал үүсэхгүй.

-Хүсэлт гаргасан иргэдийг орлогоор нь ангилаад эхэлчихсэн үү?
-Тэгсэн. Хүсэлт гаргасан хүмүүсийн орлого, авах орон сууцны байршилаар нь ангилж байгаа.

-Сарын өмнө хүсэлт гаргасан хүний орлого одоо өссөн бол бөглөсөн маягтад нэмж тусгаж болох уу. Төрийн албан хаагчдын цалинг аравдугаар сарын 1-нээс нэмнэ. Өнөөдөр хүсэлт гаргасан хүний орлого тэр үед өөрчлөгдчихнө шүү дээ?
-Хүсэлт гаргасан хүн бүрийн маягт кодтой. Тэр кодоо хэлээд орлогын өөрчлөлтөө маягтдаа тусгуулах боломжтой. Зээл авах үед банк орлогын тодорхойлолт гаргуулж баталгаажуулна. Бид хүсэлт гаргагчдыг мэдээллийн нэгдсэн санд оруулна. Түүнд иргэдийн орлогын өөрчлөлтийг тухай бүрт нь нэмж бүртгэнэ. Түүнээс дахиж маягт бөглөх шаардлагагүй. Хүмүүс орлогоо нягталж, тодорхойлоод эхэлсэн. Орон сууцанд орох боломж бий болсон учраас үүний төлөө ажилладаг болжээ.

-Тодорхойлох боломжгүй орлоготой хүмүүс яах вэ?
-Банк орлогыг нь тодорхойлчихно. Банкин дахь дансандаа байнга орлогоо хийгээд явахад л болно. Колумб улс гэхэд л орон сууцны ийм зээл хэрэгжүүлэхэд нэг жилд банкинд 60 мянган данс нээгдэж байсан гэсэн. Энэ нь банкны үйл ажиллагаанд маш том түлхэц болдог.

ӨНӨӨДӨР