Улаанбаатар хотод жилд дундажаар орон нутгаас 60 мянган иргэн ирж суурьшдаг гэсэн тооцоо байдаг. Энэ ч утгаараа Монгол улсын хүн амын 50 гаруй хувь нь аж төрдөг нийслэл хот боловсролын тал дээр ихээхэн анхаарал хандуулан ажиллаж байна. Энэ жил нийслэлийн 108 ерөнхий боловсролын сургууль, цэцэрлэгт урсгал засвар хийж, өргөтгөл хийх, шинэ сургуулийн барилга барихад улс, хот, гадаад, дотоодын хөрөнгө оруулагчдаас 1,8 тэрбум төгрөг зарцуулаад байгаа аж. Үүнээс 750 сая төгрөгийг урсгал засварын ажилд зарцуулаад байна. Засвар, өргөтгөлийн ажил өнөөдрийн байдлаар 95 хувьтай байгаа аж. Өнгөрсөн баасан гарагт нийслэлийн Засаг даргын орлогч Б.Баатарзориг сургууль, цэцэрлэгүүдийн  засварын ажилтай танилцлаа. Энэ жил хамгийн бага хөрөнгөөр засварын  ажил хийсэн  байгууллага бол Баянзүрх дүүргийн нийслэлийн тэргүүний 32дугаар цэцэрлэг юм. Таван сая төгрөгөөр  засварын  ажил хийсэн  уг цэцэрлэгийнхэн  засвараа дуусгаж, хүүхдүүдээ хүлээж авахад бэлэн  болсон байв. Эднийх орчныхоо тохижилтыг сайн хийжээ. Шинээр зүлэгжүүлэлт хийж, цэцгийн мандал байгуулжээ. Мөн ариун цэврийн өрөөгөө ч орчин үеийн технологоор цэвэрхэн  тохижуулсан байв. Цэцэрлэгийнхэн  энэ жилдээ 130 орчим  хүүхдийг хүлээж  авах боломжтой гэж байв. Үүнийхээ үр дүнд тэд нийслэлийн орлогч даргаас онц сайн үнэлгээг авсан юм. Харин баянзүрх дүүргийн 11-жилийн “Шавь” цогцолбор клиник сургууль хамгийн их хөрөнгөөр засвар хийж буй аж. Засварын ажлын 130 орчим сая төгрөг, үйлдвэрлэл сургалтын танхим, цахим номын санг байгуулахад шаардагдсан 230 орчим сая төгрөгийг "Азийн хөгжлийн банк"-наас санхүүжүүлж байгаа аж. Тус сургууль 1978 онд ашиглалтад орсон бөгөөд ашиглалтад орсноосоо хойш анх удаагаа засвар хийж байгаа юм байна. Есөн сарын нэгэн гэхэд бүх ажлаа дуусгасан байна хэмээн гүйцэтгэгч компани болон сургуулийн захиргаа мэдэгдэж байсан. Энэ сургуульд 3470 орчим хүүхэд боловсрол эзэмшдэг аж. Нийслэлийн Засаг даргын орлогч Б-Баатарзориг засварын ажилтай танилцаж явахдаа, "Энэ жилийн хувьд нийслэлийи хэмжээнд шинэ боловсролын тухай хуулийг эрчимтэй хэрэгжүулэхээс гадна "Сайхан орчинд сайн хүүхэд төлөвшүулэх, сайн хүүхэд сургах" гэсэн нэгдмэл зорилт тавьж байна. Энэ хүрээнд засвар үйлчилгээ хийсэн сайхан барилга байгууламж, багш сурагчдын сайхан харьцаа, эцэг эх, аж ахуйн нэгжийн хамтын ажиллагаа, тохьтой орчинг бүрдүүлэх зорилго тавьж байгаа. Үүнд "Дэлхийн зөн" Төрийн бус байгууллага, Мобиком корпораци зэрэг олон байгууллага, аж ахуйн нэгжүүд хувь нэмрээ оруулж байна. Хэдий зөвхөн боловсролын байгууллагуудыг дэмжиж байгаа мэт боловч цаанаа эцэг эхчүүдийн тав тухтай, амар тайван ажиллах, хөдөлмөрлөх боломжийг хангаж, хүүхдүудийг нь сайхан орчинд сайн төлөвшүүлэх, хөгжүүлэх, сургах ажлыг хийж байна гэж ойлгож болно" хэмээн онцолж байв.