УБТЗ-ын тээвэрлэлт удааширснаар Замын-Үүдийн боомт дээр иргэдийн ачаа хүлээлтийн байдалтай байгаа нь өргөн хэрэглээний барааны үнэ нэмэгдэх нэг шалтгаан болж байна. Энэ нь төмөр замын ачааны вагон, зүтгүүр хүрэлцэхгүй байгаатай холбоотой юм. Зүтгүүруүдийн эвдрэл ихтэй, засварлах гэж ихээхэн хугацаа алдаж байгаа хэмээн төмөр замынхан мэдэгдсэн. Мөн төмөр замаар ачаагаа тээвэрлүулсэн хувь хүн, компаниуд ачаагаа буулгахгүй байгаа нь үүнд нөлөөлж байна. Улаанбаатар өртөөнд гэхэд "Ойн бирж" ХХК-ийн 18 вагон битум, "АЗЗАН" ХХК-ийн дөрвөн вагон битум З6 хоног, "Ялгуусан" ХХК-ийн хоёр вагон ачаа 31 хоног буулгах замгүй гэсэн шалтгаанаар зогсжээ.
Замын-Үүдээс ачигдсан "Сунно интернэйшнл" ХХК-ийн 23 вагон цемент, "Сөүл Вин" ХХК-ийн 25 вагон цемент Толгойт өртөөнд ачаагаа буулгалгүй тав хонож байна. Энэ нь ачааны урсгал ихэссэн үед олон вагоныг сул зогсоож, эргэлтийг удаашруулж, ачаа илгээгчийн захиалгыг биелүүлэхэд хүндрэл учруулж байгаа аж. Нөгөөтэйгүүр төмөр замын ачаалалд хичээлийн шинэ жил ч буруутан болж байна. Хичээлийн шинэ жил эхлэх үеэр хувь хүмүүс, компаниуд урд хөршийг зорьдог. Хамгийн гол нь тэд урьдчилж захиалгаа өгдөггүй нь төмөр замын ачаалалд нэмэр болдог байна. УБТЗ тээвэрлэлтийн гэрээгээ компаниудтай нэг сарын өмнө хийх ёстой ч гэрээ хийдэг компани цөөхөн байдаг гэнэ. Хоногт дунджаар 200 гаруй вагон ачааг ачуулж байгаа ч энэ нь Замын-Үүдийн боомт дахь ачааны бөөгнөрөлийг хэвийн байдалд оруулж чадахгүй байна.