Бонд гаргаснаар аливаа томоохон төсөл хөтөлбөрийн санхүүжилтийг эрсдэл багатайгаар олох бололцоо олгодог билээ. Манай орны хувьд 1996 оноос Засгийн Газар бонд гаргаж эхэлжээ. Засгийн Газрын  бондын хувьд улсын төсвийн хөрөнгөөр баталгааждаг тул  хамгийн найдвартай, эрсдэлгүй, үнэт цаасад тооцогддог. УИХ-аас жил бүр зах зээлд гаргах Засгийн Газрын бондын хэмжээг баталдаг бөгөөд тэрхүү тогтоосон хэмжээгээр Засгийн  Газар бондоо Монголын хөрөнгийн биржээр дамжуулан нээлттэй арилждаг байна. Бондын зориулалтын хувьд өнгөрсөн  хугацаанд ихэвчлэн Улсын төсвийн алдагдлыг нөхөх зорилготой гардаг байсан бол энэ жилийн хувьд "40000 орон сууц" хөтөлбөрийг санхүүжүүлэх зорилготой.

Улмаар 60.0 тэрбум төгрөгний бонд гаргах зөвшөөрлийг Улсын Их Хурал, Засгийн газарт олгосон. Одоогийн байдлаар Монголын хөрөнгийн бирж дээр 24.2 тэрбум төгрөгийн бонд арилжаалагдаад байна. Бонд арилжиж төвлөрсөн хөрөнгийг арилжааны банкуудаар дамжуулан иргэдэд орон сууц худалдан авахад нь зориулж урт хугацаатай, хөнгөлттэй зээл олгох юм. Түүнчлэн хөтөлбөрийн хүрээнд орон сууц барьж буй барилгын компаниудад эргэлтийн хөрөнгө болон бусад шаардлагатай хөрөнгийг яь олгох зорилготой аж. Хэрэв Засгийн газрын бонд худалдан авах бол Монголын хөрөнгийн биржийн гишүүн Брокер, Дилерийн компаниудын аль нэг дээр нь дансаа нээлгэн мөнгөө байршуулснаар бонд худалдаж авах эрхтэй болох юм.