Өнөөдөр “Мишээл экспо” төвийн үзэсгэлэнгийн танхимд Барилгын салбар үүсч хөгжсөний 81 жилийн ойн арга хэмжээг угтсан намрын уламжлалт “Барилга-Орон сууц-тавилга, Банкны зээл” сэдэвт барилгын үзэсгэлэн яармаг нээлтээ хийлээ. Үзэсгэлэн яармагт барилга угсралт, тавилга, барилгын материалын үйлдвэрлэл худалдаа эрхлэгч, байр орон сууцны зээл санхүүжилт олгож буй хөрөнгө оруулагч банкууд оролцож байгаа бөгөөд Барилга, хот байгуулалтын яам, “Мишээл экспо” төв, ХААН банк болон Барилгын бирж хамтран зохион байгуулж, харин БАРИЛГА.МН дэмжигч байгууллагаар оролцож байгаа юм.

Нээлтийн ажиллагаанд үзэсгэлэнг зохион байгуулагч байгууллагуудын төлөөлөл болох БХБ-ын дэд сайд Ц.Дашдорж, БХБНААҮТ-ийн дарга Л.Бямбажав, ХААН банкны дэд захирал н.Батсайхан, Барилгын биржийн захирал Л.Зундуй нар оролцон үг хэлж, Монголын барилгын салбар хурдацтай хөгжиж байгааг онцлон тэмдэглэж, үзэсгэлэн оролцогчдод амжилттай оролцохыг хүслээ.

Үзэсгэлэн яармагт нийтдээ 120 гаруй байгууллагууд оролцож өөрийн угсарч буй байр орон сууц, худалдаалж буй тавилга, барилгын материал, олгож буй зээлийн үйлчилгээгээ сурталчилж байна. Тухайлбал, ХААН банк гэхэд орон сууцны зээлийг 10 жилийн хугацаатай, жилийн 1.5%-1.3%-ийн хүүтэй олгож байгаа аж. Мөн барилгын салбарт шинэ технологи, бүтээгдэхүүн үйлчилгээ нэвтрүүлж байгаа “Монгол базалит” ХХК, “Эс Пи сервис” ХХК, “Алъянс Тех” ХХК зэргийн аж ахуйн нэгжүүд оролцож байна.

Барилгын салбарын ойн баярыг угтан зохион байгуулагдаж буй үзэж харах зүйл ихтэй тус үзэсгэлэн ирэх 09 сарын 03-ны өдөр хүртэл үргэлжилнэ.