Манай гаригт “ногоон” технологийг хэрэглэвэл зохих олон барилга байгууламж байдгийн нэг нь Нью-Йорк хот дахь Нэгдсэн Үндэстний Байгууллагын шилэн барилга ажээ. “Ногоон” технологи гэж юуны өмнө барилгадаа нарны болон салхины эрчим хүч, борооны ус, далайн таталт түлхэлтийн эрчим хүчийг ашиглахыг хэлж байгаа ажээ.

Нью-Йорк хотын Манхэттэн дүүрэг дэх НҮБ-ын алдарт 39 давхар төв байр удахгүй 60 насныхаа ойтой золгох юм байна. Тун удахгүй бас тус барилгыг сэргээн засварлаж эхлэх гэж байгаа бөгөөд түүнд нь дээр дурьдсан “ногоон” технологийг ашиглахаар төлөвлөсөн аж. Эдүгээг хүртэл НҮБ-ын төв байр их засварт ороогүй байгаа бөгөөд орчин үед тавигдах болсон аюулгүй байдлын шаардлагыг хангахгүй болоод байгаа гэнэ.

Хийгдэх их засварт хамгийн түрүүнд тавигдаж байгаа зорилт нь эрчим хүчний хэрэглээг 30% бууруулах явдал багтаж байгаа аж. Үүний тулд барилгын бүх гэрэлтүүлгийн системийг өөрчилнө. Улайсах чийдэнгийн оронд орчин үеийн гэрэлтүүлэх багаж хэрэгслийг ашиглах ба бүх өрөөг мэдрэгч бүхий өгөгдөл дамжуулагч/датчик/-аар тоноглох аж /хүнгүй өрөөний гэрэл автоматаар унтарна/. Дээвэр болон нүүрэн талд нь нарны зай суурилуулана. Дулааны эрчим хүчийг хэмнэх үүднээс хуучин асбестаар хийсэн халаагууруудыг орчин үеийн материалаар, мөн цонхны бүх хүрээг солих юм.

Сэргээн засварлах ажлыг долоон жилийн хугацаанд хийж гүйцэтгэхийн тулд 1.2 тэрбум ам.долларын хөрөнгө шаардлагатай байгаа ажээ. Харин засвар хийлгүйгээр ердийн ажиллах нөхцөлийг нь хангах байдлаар явахад ирэх 25 жилийн дотор 2 тэрбум гаруй ам.доллар зарцуулахаар байгаа юм байна. 

Дашрамд дурьдахад, НҮБ-ийн барилгыг 1949-1950 онд Америкийн архитектор Уоллес Харрисоны удирдлаган дор олон орны шилдэг дизайнер, архитекторууд бүтээн байгуулсан байна.