Монголын хэрэглэгчдийн эрх ашгийг хамгаалах нийгэмлэгүүдийн үндэсний холбоонд "Монгол дээвэр" ХХК гомдол гаргажээ. Тус компани Хөтөлийн "Цемент-Шохой" ХК-иас 130 тонн савтай цемент тонныг нь 79816 төгрөгөөр худалдан авч. Үнийн дүнд 10.626.554 төгрөг шилжүүлсэн байна. Хөтөлийн үйлдвэр вагон байхгүй шалтгаанаар уг цементийг ачихгүй байсаар 57.4 тонн цемент ирүүлжээ. Гэхдээ тонн нь 107.052 төгрөг болж үнэ нь нэмэгдсэн байж.
Уг гомдлын дагуу Монголын хэрэглэгчдийн эрх ашгийг хамгаалах нийгэмлэгүүдийн үндэсний холбоо цементийн үнийн хөөрөгдөлтийн талаар шалгалт явуулжээ.
Гэтэл өчигдрийн байдлаар цементийн үнэ тонн нь 160 мянган төгрөгийн ханштай байлаа. Уг нь цементийн үнийг тогтоохдоо Монгол Улсын Засгийн газраас "40 мянган айлын орон сууцны хөтөлбөр"-ийг дэмжин цементийг барилгын компаниудтай үйлдвэрийн үнээр хүргэх зорилго тавьжээ.
Сүүлийн үед барилгын материалыг төмөр замаар тээвэрлэх зардал 20 хувь өссөн төдийгүй түгжрэл бий болсон. Шатахууны үнэ ч өдөр ирэх тусам нэмэгдсээр байгаа. Мөн цементийн гол түүхий эд шохой чулуу, гөлтгөнө, төмрийн хүдэр, нүүрсний үнэ ч нэмэгдсэн. Эдгээр шалтгааны улмаас цемент үйлдвэрлэгч үндэсний үйлдвэрүүд өртгөө арга буюу нэмэхэд хүрсэн.
Гэвч энэ байдлыг далимдуулан барилгын ажил ид өрнөж цементийн эрэлт хэрэгцээ нэмэгдсэн өнөө үед дамын наймаачид үнийн хий хөөрөгдөл бий болгожээ. Үүнээс болж Хятадаас импортоор оруулж байгаа цементийн үнэ тонн нь 90-120 мянган төгрөг байснаа огцом өсч 140 мянган төгрөгт хүрчээ.
Энэ мэтээр үнийн хөөрөгдөл, цементийн хомсдол барилгын ажилд саад учруулж дээрх ажлыг хариуцан гүйцэтгэж буй барилгын байгууллагыг бухимдалд хүргэжээ.
Хэрэглэгчдийн эрх ашгийг хамгаалах нийгэмлэгүүдийн үндэсний холбооны гүйцэтгэх захирал Л.Билэгт Цементийн үнийн өсөлт нь Засгийн газрын "40 мянган айлын орон сууц хөтөлбөр"-ийг хэрэгжүүлэхэд муугаар нөлөөлж болзошгүй юм. Мөн хөрөнгө оруулалт бүтээн байгуулалтын ажилд саад тотгор учруулах таагүй үр дүнд хүрч болохыг үгүйсгэхгүй" гэв.