Нийслэл хотод зам засварын их ажил явагдаж байгаа. Засварын ажлын талаар Нийслэлийн авто замын газрын дарга Д.Бат-Эрдэнэтэй уулзаж тодруулсан юм.

-Энэ жил зам засварын ажилд улсын төсвөөс нэлээдгүй хөрөнгө гаргаж байгаа. Ажлын явц ямар байна вэ?
-Улаанбаатар хотод нийт 22 объектод томоохон зам засварын ажил хийж байна. Ер нь нийслэлд нийт 362 километр хатуу хучилттай зам байдаг. Дээр нь 42 километр бетонон зам бий. Дээрх замын 80 хувь нь 30,40 жил ашиглагдсан. Насжилтын хувьд өндөр болсон. Тиймээс энэ жил урьд байгаагүй засварын ажил хийж байна. Манай мэргэжилтнүүдийн хийсэн судалгаанд нийт замыг засварлахад 126 тэрбум төгрөгөөр шинэчлэл хийнэ гэсэн байдаг юм. Нийслэлийн зургаан дүүргийн орон сууцны хороололд 512 сая, төвийн замын нөхөөс урсгал засварт 300 орчим сая, алслагдсан Багануур, Налайх, Багахангай дүүргийн замын нөхөөс тавихад 500 сая төгрөг төсөвлөсөн. Шинэ зам тавихад 4.7 тэрбум төгрөг орно.
        Зам засахын хажуугаар замын уулзвар дахь гэрлэн дохиог засварлах, мөн замын хажуугаархи болон хэвтээ тэмдэглэгээг засварлах, шинээр тавих гэсэн ажлыг хийж байна. Энэ жил бас нэг онцлогтой засвар хийх байгаа. Замын зураг төслийг хийхдээ инженерийн байгууламж, шугам сүлжээг хийж, борооны усыг зайлуулах, замын дагуух гэрэлтүүлэг хийх, явган хүний зам, хайс, хашлага, хөгжлийн бэрхшээлтэй иргэдэд зориулсан замыг хүртэл нэмж тавьж байгаа.

-Зам засварын ажилд хүндрэл учирч байгаа тухай сонссон юм байна?
-Тэгэлгүй яах вэ. Хүндрэлийг тоочоод байвал нэлээд байна. Зам засварын ажлыг гүйцэтгэж буй компаниуд цаг хугацаандаа ашиглалтад оруулахгүй хойшлох тохиолдол гарч байна. Тухайлбал, “Цахилгаан шугам сүлжээ” ХК бидний ажлыг хүндрүүлж байна. Учир нь нийслэлийн замын доогуур шугам сүлжээ их байдаг. Манай цэвэр, бохир усны, цахилгаан, холбооны сүлжээ бүгд газар дор байрладаг юм. Тэр компани өөрийн шугам сүлжээгээ зайлуулж өгч бидний ажилд туслах ёстой. Мөн газрын асуудал байна. Тухайлбал, айлын амьдарч буй газар орсон зам тавих ажил байгаа. Гэтэл тэр айлын газрыг үнэлээд байхад айлууд нь үнэлсэн мөнгийг нь чамлаад нүүхгүй цаг хугацаа их авч байна.

-Өнгөрсөн жил 32-ын тойргийн шинэ замын ажилд нэг айл бас үнэлэгдсэн мөнгийг голоод “гэдийж” байсан. Энэ жил айлын газрыг хэдэн төгрөгөөр үнэлж байгаа юм?
-Энэ үнэлгээг Нийслэлийн өмчийн газрын харилцаанаас үнэлж өгдөг. Нэг айлын газрыг 3.5-5 сая төгрөгеөр үнэлсэн. Гэтэл тэр айлуудын эзэн 20 саяыг авна гээд гэдийгээд байгаа л юм. Тухайлбал, Дамбадаржаагийн чиглэлд 1.7 км за.м, Гэсэр сүмээс хойш Баянхошууны арын хөтлийн 2.9 км замд энэ мэт саад бэрхшээлээс болоод цагтаа зам засварын ажил удаж байна.

-25 дугаар эмийн сангийн баруун талын замын ажил ч удааширч?
-Энэ Чингүнжавын гудамжны тэр замын доогуур бохирын шугам шинээр тавьж байгаа. БХБЯ-наас маш урт шугам тавьж байгаа юм. Үүнтэй уялдуулж замын ажлыг хийж байна. Удахгүй дуусна. Ард иргэдэд буруу ойлголт байх юм. Учир нь зам зам засварын ажил гэдэг чинь зүгээр дээрээс нь шууд шинэчлээд байдаг юм биш. Хуучин замыг хөрсөөр нь авч байж дахин шинээр хучилт хийдэг.

-Зам засварын ажлын гүйцэтгэлийг хийж буй компани тендерт ялж мөнгө авчихаад алга болчихсон тохиолдол гарч байсан уу?
-Зам засварын ажил хийдэг 40 гаруй бүртгэлтэй компани байдаг. Ямар ч ажлыг том жижиг гэлтгүй тендерт орж өрсөлддөг. Энэ жилийн хувьд чансаатай компаниуд тендерт ялж ажлаа хийж байна. Ийм яриа хэвлэлээр, мөн иргэдийн дунд гарсан бид мэдэж байгаа. “Нутгийн зам” компани алга болсон юм байхгүй. Тэр компани Баянхошуунд 1.3 км замыг өргөтгөж шинэчилж байна. Ажлынх нь хувьд жигдэрчихсэн байгаа. Манай газар хяналт тавьж ажиллаж байгаа. Замын ажил улирлын чанартай болохоор ажил эрчимтэй хийгдэж байна.
-Зам засварын ажил жил бүр л хийгдэх юм. Яагаад ингэдэг юм бэ?

-Ер нь жилийн жилд зам засварын ажил хөрсөн дээр хасах 10 градус хүрвэл автоматаар ажлыг дуусгадаг. Өчгөрсөн жил 32-ын тойрогт нэг айл нүүхгүй байснаас ажил удааширсан юм. Тэгээд шууд ажлаа зогсоосон. Харин хавар нэмэх градуст ороход ажлаа гүйцэт дуусгасан. Үүнийг иргэд дахин засвар хийлээ гэж яриад буруу ойлгоод байх юм. Ер нь тендерт ялаад ажлаа хийж дуусгасан компани нэг журмаар ажилладаг. Тендерт ялаад хэдэн төгрөгийн ажил хийх болсон, түүнийхээ 10 хувийг нийслэлд барьцаалаад авч үлддэг. Тухайлбал, тэрбум төгрөгийн ажил хийхээр болсон бол 100 сая төгрөгөө барьцаанд үлдээгээд ажлаа хийж дуусгана. Тэгээд улсын мэргэжлийн хяналтынханд хүлээлгэж өгнө.Дахин жилийн баталгаа өгч харна. Жил дотор зассан замд нь гэмтэл, хагарал учирвал түүнийг тус компани өөрийн хөрөнгөөр дахин хийх юм. Тэгээд жилийн хугацаа дууссаны дараа барьцаан дахь 100 сая төгрөгөө авах ёстой. Энэ журмын дагуу энэ жилийн зам засварын ажил хийгдэж байгаа.
-Энэ жилийн зам засварын ажил хугацаандаа дуусах уу?
-Бүгд зуун хувь цагтаа дуусна. Хамгийн сүүлчийн хугацаа аравдугаар сарын 15-ны өдөр байна.