Монгол Улсын Их Хурлаас 2006 оны 6 сард батлан гаргасан "Хувь хүний орлогын албан татварын хууль"-д татвар төлөгч иргэний нийгмийн болон боловсролын салбарт оруулж буй хөрөнгө оруулалтыг татварын бодлогоор дэмжих зорилгоор албан татварын хөнгөлөлт, чөлөөлөлтийг хуульчилан тусгасан болно

Татвар төлөгч хувь хүний албан татвар ногдох орлогоос хууль тогтоомжид заасан тэтгэвэр, тэтгэмж, төлбөр, нөхөн олговор, нэг удаагийн буцалтгүй тусламжаар олгож буй орлогыг, өөрийн болон банк, санхүүгийн байгууллагаас авсан зээлийн хөрөнгөөр амьдран суух зориулалтаар анх удаа хувьдаа орон сууцны барилга барих, эсхүл худалдан авахад зарцуулсан 30.0 сая төгрөгөөс дээшгүй хэмжээний хөрөнгөтэй тэнцэх орлогыг татвараас чөлөөлөх, мөн ажил олгогчоос олгож буй цалин, хөдөлмөрийн хөлс, шагнал, урамшууллын орлогод ногдох жилийн албан татвараас 84000 төгрөгийг, төрсөн буюу үрчилсэн хүүхдийнхээ гадаад, дотоодын их, дээд болон мэргэжлийн боловсролын сургууль, коллежийн сургалтын төлбөрт төлсөн төлбөрийг татвараас хөнгөлөх зэрэг олон төрлийн хөнгөлөлт, чөлөөлөлт үзүүлж байхаар заасан.

Хуулиар олгогдсон хөнгөлөлт, чөлөөлөлтийг албан татвар төлөгч хувь хүнд эдлүүлэхдээ тухайн жилд төлсөн албан татварыг дараа онд төлөх албан татвараас нь суутган тооцох буюу эсвэл төсвөөс буцаан олгох зарчмыг баримталж байна.

Жишээлбэл сард 300.0 мянган төгрөгийн орлого бүхий татвар төлөгч 2007 онд амьдран суух зориулалтаар 50.0 сая төгрөгийн өртөг бүхий орон сууц  худалдан авсан бол 30.0 сая төгрөгтэй тэнцэх орлогыг нь татвараас  чөлөөлөлж 2007 онд олсон, жилийн албан татвар ногдох орлогоос хасч тооцно.   Татвар төлөгч нь  2007 онд өөрийн орлогоосоо улсад 324.0 мянган төгрөгийн татвар төлсөн гэвэл дээрх татвартай тэнцэх хэмжээний албан татварыг тухайн татвар төлөгчийн 2008 онд төлөх албан татвараас суутган тооцох буюу буцаан олгоно гэсэн үг юм.

Сарын 300.0 мянган төгрөгийн жилийн 3600.0 /300.0 х12 сар/  мянган төгрөгийн орлоготой татвар төлөгч нь дээрхи албан татварын чөлөөлөлтийг 7 жилийн хугацаанд эдлэж дуусах бөгөөд түүний худалдаж авсан 50.0 сая төгрөгийн байрны үнийн 30.0 сая төгрөгийн татвар ногдох орлоготой тэнцэх 3.0 сая төгрөгийг төрөөс чөлөөлж өгөх юм.      

ҮТЕГ-ЫН ТАТВАР ХУРААЛТ, ҮЙЛЧИЛГЭЭНИЙ ХЭЛТЭС