Ирэх оны 2-р улиралд Дорноговь аймагт жилдээ нэг сая цемент үйлдвэрлэх хүчин чадалтай үйлдвэр ашиглалтанд орох нь ээ. 30 сая америк долларын төсөвт өртөгтэй энэ үйлдвэрийг Барилга, хот байгуулалтын яам, Хонконгийн барилгын компанитай хамтран байгуулах юм. Хамтын ажиллагааныхаа гэрээнд 2 тал өнөөдөр гарын үсэг зурж баталгаажууллаа.
Манай улсад цементийн шинэ үйлдвэр ирэх оны сүүлээр ашиглалтад орох нь ээ. БХБЯ, Хонконгийн Рю Жин Е минерал лимитед компани хамтран Дорноговь аймгийн Өргөн сумын нутаг дах Ялгуун интернэшнл компанийн Сөгдөхийн шохойн чулуун орд газар дээр цементийн шинэ үйлдвэрээ байгуулахаар болж, өнөөдөр гэрээнд гарын үсэг зурлаа. 2 тал өнгөрсөн 3-р сараас эхлэн цементийн үйлдвэр байгуулах тал дээр судалгаа явуулж, эдийн засгийн үр ашгийн тооцоог гарган, манай орны түүхий эдийг бүрэн түшиглэсэн энэ үйлдвэрийг байгуулахаар болсон байна. Энэ үйлдвэр нь жилдээ 1 сая тонн хуурай цемент үйлдвэрлэх хүчин чадалтай, ОУ-ын чанарын стандартын шаардлага хангасан бүтээгдэхүүнийг зах зээлд нийлүүлэх гэнэ.
Хуурай аргаар бүтээгдэхүүнээ үйлдвэрлэх юм байна. Энэ технологи нь өнөөдөр дэлхийд хэрэглэж байгаа хамгийн сүүлийн үеийн цемент үйлдвэрлэх арга. Түүхий эдийн орц, цахилгаан болон усны хэрэглээ, дуу шуугианы түвшин, тоосжилт зэрэг үзүүлэлтээрээ байгаль орчинд сөрөг нөлөө багатай байхыг мөн тооцоолсноо тэд хэлж байлаа. Түүнчлэн энэ төрлийн хүнд үйлдвэрлэл явуулж байгаа цементийн бусад үйлдвэрүүдээс нэгж бүтээгдэхүүнд зарцуулагдах цахилгааны хэмжээ 20 хувь, усны хэрэглээ 50-80 хувь, дулаан зарцуулалт 30 хувиар бага зарцуулах үйлдвэр болохыг тэд онцолсон. Дотоодын шинэ бүтээгдэхүүн болох шинэхэн цемент 2008 оны 2-р улирлаас үйлдвэрээс гарч, зах зээлд борлуулагдаж эхлэх юм байна. Нийт 30 гаруй сая ам долларын төсөвт өртөгтэй энэ хуурай цементийн үйлдвэрт 200 гаруй ажилчин албан хаагчид ажиллах юм байна.
Хонконгийн Рю Жин Е минерал лимитед компанийн тухайд товчхон танилцуулахад, уул уурхайн салбарт, тэр дундаа ашигт малтмал боловсруулж, эцсийн бүтээгдэхүүнийг үйлдвэрлэн борлуулахад туршлага хуримтлуулсан компани юм байна. Вьетнам, Камбожи, Пакистан зэрэг оронд нүүрс, жонш, төмрийн хүдэр олборлодог гэнэ. Сүүлийн 2 жилийн хугацаанд Хонконгийн энэ компани гадаадын орнуудад нийтдээ 71 сая ам долларын хөрөнгө оруулалт хийгээд байгаа гэсэн.
Сүүлийн жилүүдэд манай барилгын салбар хөгжиж, барилга орон сууцны захиалагчид олширч, үүнээс үүдэн барилгын үндсэн материалын үнэ огцом өсч үүн дотроо цементийн үнэ өнгөрсөн 3 сарын дотор 2,5 дахин өсөөд байна. Одоо үйл ажиллагаагаа явуулж байгаа үндэсний 2 цементийн үйлдвэр улс орны цементийн хэрэгцээний дөнгөж 30-50 хувийг үйлдвэрлэж, барилгын компаниуд ихэвчлэн гадаадаас буюу урд хөршөөс ихэнх цементийг оруулж ирсээр байна. Тэгвэл шинэ цементийн үйлдвэр ашиглалтад орсноор Монголын үйлдвэрлэгчид дотоодын зах зээлийг цементээр бүхэлд нь хангах боломжтой болж байгаа гэнэ.