Монгол Улсын Засгийн газраас 2007 оныг "Их бүтээн байгуулалт-шинэ ажлын байр нэмэгдүүлэх" жил болгон зарлаж, зам барилгын ажилд үлэмж их хөрөнгө хуваарилаад байгаа билээ. Хүйтний ам наашилж, хөхүүрийн ам цаашлах тийшээгээ хандсан энэ үед зам барилгын ажлын явц ямар байгаа бол?
Авто замын салбарт Улсын төсөв болон "Монгол Улсыг хөгжүүлэх сан"-гийн хөрөнгө оруулалтаар 67.5 тэрбум төгрөг, гадаадын зээл тусламжаар 45,5 сая ам.долларын хөрөнгөөр нийт 1200 гаруй км авто зам, 700 гаруй метр урттай төмөр бетон гүүрийн барилгын ажил хийгдэж байгаа бөгөөд 2007 онд 500 км авто зам, 300 уртааш метр гүүрийг ашиглалтад оруулах зорилт дэвшүүлсэн байна.
Нийслэл Улаанбаатар хотын хувьд нэлээд газруудад зам барилгын ажил явагдаж байгаагаас хамгийн их иргэдийг бухимдуулж байгаа зам бол СХД-ийн нутаг дэвсгэрт баригдаж байгаа зам юм. Тодруулбал, Геологийн төв лабораторийн зүүн талаас хойш чиглэж тролейбусны депо, Хангай зах хүртлэх 1.2 км авто замыг өнгөрсөн зургадугаар сараас шинэчлэн барьж наадмын өмнө ашиглалтад өгөхөөр төлөвлөжээ. Энэ зам барилгын ажил нь урьдчилсан төлөвлөгөө, ажлын уялдаа холбоогүй, хариуцлагагүй байдлаас өнөөг хүртэл ашиглалтад ороогүй л байна.
ЗТАЖЯ-наас мэдээлж байгаагаар зам барилгын ажлыг чанарын өндөр түвшинд хугацаанд нь гүйцэтгэж Улсын ашиглалтад хүлээлгэн өгөхөд онцгой анхаарч, ЗТАЖ-ын сайдын  2007 оны 71-р тушаалаар энэ онд шинээр баригдаж эхэлж байгаа болон он дамжин баригдах  авто зам, гүүрийн барилга, засвар арчлалтын ажлын явцад газар дээр нь хяналт тавьж тухайн объектод гарч байгаа бэрхшээлтэй асуудлыг цаг алдалгүй түргэн шуурхай шийдэж хугацаанд ашиглалтад оруулахыг үүрэг болгожээ. Энэ ажлын хүрээнд нөхцөл бололцоог ханган ажиллах үүрэгтэй Ажлын хэсгүүдийг байгуулан ажлын явцын тайлан мэдээг долоо хоног тутам ЗТАЖЯ-ны шуурхай зөвлөлгөөнөөр хэлэлцэн холбогдох арга хэмжээг цаг тухайд нь зохион байгуулан ажиллаж байгаа аж.
Тус яамны Төрийн нарийн бичгийн дарга Ц. Бат-Энхээр ахлуулсан Ажлын хэсэг 2007 оны долдугаар сарын  сүүлчээр долоон хоногийн хугацаатай Төв, Булган, Архангай, Орхон, Өвөрхангай, Хөвсгөл аймгуудын нутаг дэвсгэрт баригдаж буй авто замуудын  барилгын ажлын явцтай танилцжээ. Эдгээр зам барилгын ажлуудад тулгамдаж байгаа асуудалтай уг Ажлын хэсгийнхэн танилцаж зөвлөмж өгч, тухайн орон нутгийн удирдлагуудтай уулзан хүндрэлтэй асуудлуудыг цаг тухайд нь шидвэрлэж өгсөн байна. Ажлын хэсэг томилолтын хугацаандаа 28 хэсэг бүхий нийт 638.9 км авто замын барилгын ажилтай газар дээр нь танилцжээ. Тухайлбал, Эрдэнэт хотын гэр хорооллын 3.56 км хатуу хучилттай авто зам, Булган-Уньт чиглэлийн 74 км хатуу хучилттай авто зам, Хатгал-Жанхай-Тойлогт чиглэлийн 30.4 км хайрган хучилттай авто зам, Цэцэрлэг-Их тамир-Тосонцэнгэл чиглэлийн 53 км хатуу хучилттай авто зам, Хархорин-Цэцэрлэгийн 74 км хатуу хучилттай авто зам, 46.9 км хайрган хучилттай авто зам, Арвайхээр-Баянхонгорын 23 км хатуу хучилттай авто зам, Хөшөөцайдам-Өгийнуур чиглэлийн  хатуу хучилттай авто зам, Дашинчилэн-Орхоны гүүр чиглэлийн 109 км хатуу хучилттай авто зам, Улаанбаатар-Лүн-Эрдэнэсант чиглэлийн 168.3 км хатуу хучилттай авто зам зэрэг замуудын ажилтай танилцсан байна.
Одоогийн байдлаар гүйцэтгэгч компаниудын ажил ерөнхийдөө жигдэрч, техник хэрэгсэл, материал түүхий эд, хүн хүч болон хөрөнгө санхүүгийн талаар ажлыг хэвийн хэмжээнд үргэлжлүүлж хугацаанд нь ашиглалтанд өгөх бололцоотой байна гэж Ажлын хэсгийнхэн үзэж байгаа аж. Стандартын шаардлагад нийцсэн, чанар сайтай удаан эдэлгээтэй зам барьж байгуулахад чанарын хяналтыг зохих журмын дагуу явуулах нь нэн чухал асуудал юм. Энэхүү шаардлагын дагуу авто замын объект бүр дээр 2-3 хяналтын инженер байнга ажиллаж батлагдсан зураг төсөл, стандарт, техникийн шаардлагын дагуу зам барилгын ажлын технологи, материалын чанарт хяналт тавих үүргийг гүйцэтгэж байгаа аж. Орон нутгийн Засаг захиргаа, иргэдийн зүгээс бүтээн байгуулалтын ажлыг бүх талаар дэмжиж байгаа юм байна.