Найман зуун жилийн туршид инженерийн байгууламжийн оньсого болсон Пиза цамхаг хазайсаар л байгаа гэнэ. 1173 онд  цамхагийг дөнгөж барьж эхэлсний дараа хойд зүг рүү хазайж эхэлжээ. Ойролцоогоор 100 жилийн дараа үргэлжлүүлэн барьж эхэлсэн ч хазайх нь улам нэмэгджээ. 1272 оноос цамхаг хазайж байгаа нь илт мэдэгдэж эхэлсэн бөгөөд энэ удаа урд зүг рүү хазайх болов. Одоо уг цамхагийн орой нь байх ёстой газраасаа 5м 27см-ийн урд байдаг байна. Энэ агуу байгууламжийг уран барилгачид, инженерүүд хазайлтыг нь болиулах гэж оролдсоор байлаа. Гэвч 1911 оноос нарийн хэмжиж эхэлсний дараа цамхагийн орой жил бүр 1.2мм буюу ижил хэмжээгээр хазайсаар байгааг тогтоожээ. Адил загвараар баригдсан Павиа сүмийн хонхны цамхаг 1989 онд нурж унахад Пиза цамхагийн бат бэх байдлын талаар дахин санаа тавьж эхэлжээ. Энэ явдлын дараа Пиза цамхаг руу гарахыг хориглов. 1990 онд Италийн засгийн газар Итали болон гадаадын эрдэмтдээс бүрдсэн онцгой комисс байгуулж, урлагийн түүхчид, сэргээн засварлах судлаачид, барилга болон геотехникийн инженерүүдээс бүрдсэн Соnsorzio Piazza del Miracoli буюу Пиза цамхагийн Төслийн Консерциум байгуулагдаж юуны өмнө байгууламжийн тэнцвэрийг олж, бүрэн бүтэн үлдээх, хазайх хурдыг нь багасгахын тулд хэд хэдэн төсөл хэрэгжүүлсэн байна. Эхлээд цамхагийн гадна талыг судалжээ. Энэ байгууламжийн хазайлтыг зогсоохын тулд нэлээд ул суурьтай өөрчлөлт хийх хэрэгтэйг тодорхойлжээ. Барилгын ерөнхий байдалд өөрчлөлт хийхийг бүр хөрснөөс нь эхлэх болсон байна. Засварын ажил цамхаг байрлаж буй  Piazza del Miracoli буюу Гайхамшгийн талбайгаас өөрөөр хэлбэл цамхагаас хол эхэлжээ. Цамхагийн ойролцоох хөрсөнд ажиллах нь барилгад хортой болохыг бодолцон ийм арга сонгосон юм байна. Энэ ажиллагааны гол зорилго нь Пиза цамхагийг тэгшлэх биш юм. Барилгыг барьсан цагаас эхлэн одоо зүг бүр рүү хэлтийж, гадил мэт "хазайсан" учир тэв тэгш болохгүй гэнэ. Гэхдээ төлөвлөсөн ёсоороо цамхагийн оройг 10-20см хойш нь татаж чаджээ. Тэр үед эрдэмтэд аз байвал энэ барилга 21-р зууны босгыг давна гэж найдаж байжээ. Тэдний энэ ажиллагааны үр дүнд 800 жилийн туршид эрдэмтдийн дунд асуулт болоод байсан зүйлд хариу олох боломж олджээ.

Одоо хэрэгжүүлж буй аргууд
Өнөө үеийн эрдэмтэд барилгыг тэнцвэртэй байлгахын тулд янз бүрийн арга хэрэгжүүлж байна. Хазайснаас болж урд ханануудад бий болсон их хэмжээний шахалт нь цамхаг нурахад хүргэж болно гэж таамаглаж байна. Эхний давхарт ан цав үүсэхээс сэргийлж 1992 онд барилгын энэ давхрыг ган бүслүүрээр ороожээ. Аюулгүй байдлыг нь ийнхүү анхаарсны дараа мөн хазайх эрчийг нь бууруулах арга хэмжээ авч эхлэв. Юуны өмнө суурийн эргэн тойронд бетонон дэвсгэрийн хойд хэсэгт нийт 750 тн жинтэй хар тугалган цул байрлуулав. Энэ жингийн хүчээр цамхагийн хазайлтыг зогсоосноос гадна 1993 оны 6-р сараас 1994 оны 2-р сар хүртэлх есен сарын хугацаанд хойд тал руу нь 2.5см-аар хойш нь татжээ. 1995 оны 6-р сараас барилгын эргэн тойронд ахин шинэ бетонон дэвсгэр тавьж эхэлжээ. Дэвсгэр нь ган утасны тусламжтайгаар 50м-ийн гүн дэх элсэн давхаргад АНКРАЖ хийн холбох юм. Таамаглаж байгаагаар энэ аргаар ахин 2.5см-ээр хойш нь татах гэнэ. Мөн цамхагийн доорх хөрсний давхаргыг солих зорилготой ул суурьтай аргыг ч хэрэгжүүлжээ. Нэг арга нь "цахилгаан-осмос"-ын тусламжтайгаар барилгаас 10-20м-ийн гүн дэх наанги шороон (шавар) давхаргыг бэхжүүлж болно гэж үзэж байна. Ган хоолойгоор хийсэн электрод хөрсөнд байрлуулж, наанги шороонд цахилгаан талбай үүсгэнэ. Энэ маягаар наанги шороон давхрага дахь усны хэсгийг электродоор авахад барилгын хойд талын шороон давхрага доош суух юм. Энэ аргатай төстэй өөр нэг арга гэвэл хөрсний багахан хэсгийг өрөмдөн цамхагийн хойд талыг доош нь суулгах гэнэ. Хөрсний давхаргын үе багасахад цамхаг газарт тэгш байрлах боломжтой болно.