“Монголын барилгачдын өдөр”-ийг угтаж 2007 оны барилгын салбарын шилдэг 10 аж ахуйн нэгж шалгаруулахаар болсон байна. Энэ онд барилгын салбарт ажлын байр хэр нэмэгдүүлсэн, улсын төсөвт хичнээн төгрөгний татвар төлсөн зэргийн шалгуур үзүүлэлтүүдийг ханган хийж бүтээсэн ажил хөдөлмөрөөрөө манлайлсан зураг төсөл, барилга угсралт, материал үйлдвэрлэлийн байгууллагуудыг шилдэгээр шалгаруулна.
2007 оны хувьд барилга угсралтын хэмжээ өссөн, шинэ техник технологийг дотоодын барилгын материалын үйлдвэрлэлд нэвтрүүлсэн, барилгын салбар дахь гадаадын хөрөнгө оруулалт нэмэгдсэн зэргийн маш олон ахиц дэвшил гарсан ч оны дундуур барилгын үндсэн материалуудын үнэ нэмэгдсэн нь орон сууцны кв.метрийн үнэ тодорхой хэмжээгээр нэмэгдэхэд хүргээд байгаа билээ.
Юутай ч энэ улс эх орныхоо хөгжил, их бүтээн байгуулалтад оройлон оролцдог нийт барилгачиддаа удахгүй болох “Монголын барилгачдын өдөр”-ийн мэндийг хүргэе. Шалгаруулах болзолын талаар дэлгэрэнгүй мэдээлэл авахыг хүсвэл Барилга хот байгуулалт, нийтийн аж ахуйн үндэсний төвийн www.nc-cudpu.gov.mn вэб хуудсанд зочлоорой