Өнөө үед, ялангуяа залуучууд элдэв хэв маягт дуртай байдаг учраас өрөө тасалгаагаа маш хялбар арга замаар өөрчлөн тохижуулахыг эрмэлздэг болжээ. Үүнд мэдээж гэрийн мебель тавилга бүрэн утгаараа хамаарна. Хуучны “өвгөрсөн” хүндхэн номын шүүгээ гэх мэт тавилгыг өрөөнөөс өрөөнд зөөж байна гээд төсөөлдөө, амаргүй санагдаж байгаа биз. Харин үүнийг үгүйсгэсэн энгийн мөртлөө содон хийцтэй номын тавиурын загварыг Өмнөд Солонгосын дизайнер Сун Вон Пак гаргажээ. Та бага зэргийн “барилгын материал”-тай байхад тус номын тавиурыг хийчихнэ. 

Гол нь хоёр талтай байхаар /тавиурыг нь 45 хэмийн налуутай/ хийж өгөх бөгөөд өрөөний голд хана түшүүлэн тусгаарлах байдалтай буюу хоёр талыг тавиур болгон ашиглахаар хийж болно. Тавиурыг хийх гол материал нь 16 мм-ийн зузаантай фанер байна. Бас зүсэх хөрөө, зүлгүүр байвал болно. Ингээд энэ бүхний оролцоотойгоор шинэ содон стильтэй номын тавиур бүтээгдэнэ. Харин өнгө будагийг нь хийж байгаа хүн өөрөө тохируулж болно. Орчин үед энгийн мөртлөө хэв загвартай харагдахуйц, бас тэгээд үнэ өртөг багатай тавилгыг хүмүүс сонирхох болжээ. Хамтын амьдралаа дөнгөж эхлэж байгаа залуусын хувьд энэ нь бүр хэрэгцээ болж байгаа гэхэд болно.

Та гэр ахуйн тавилгын талаар илүү дэлгэрэнгүй мэдээлэл авахыг хүсвэл  энд  дарна уу