Барилга, тоног төхөөрөмжийн “CONEXPO CON/AGG 2011” үзэсгэлэн яармаг, АНУ-ын Лас Вегас хотод 2011 оны 3 сарын 22-25-ний өдрүүдэд боллоо. Энэхүү үзэсгэлэн яармагт Монголоос барилга, нийтийн аж ахуй, зам, зураг төсөл, материалын үйлдвэрлэлийн компаниуд болон төрийн болон төрийн бус байгууллагуудын нийт 90 гаруй төлөөлөгчид оролцлоо.

МБХолбоо, Барилга.МН, ААН-ийн төлөөлөгчид “CONEXPO CON/AGG 2011” үзэсгэлэн яармагын семинарын үеэр.

АНУ-ын Худалдааны хэлтэсээс зохион байгуулсан тус үзэсгэлэн яармаг нь нийт 200 гаруй мянган метр квадрат талбайд, дэлхийн 37 орны 42 олон улсын байгууллага, барилга, зам гүүр, уул уурхайн тоног төхөөрөмжийн 2,400 гаруй компани  оролцсон.

 

 

Барилгын тоног төхөөрөмж, машин механизм үйлдвэрлэлийн дэлхийн шилдэг дэлхийн хүчирхэг брэнд компаниуд тоног төхөөрөмж болон бүтээгдэхүүнээ танилцуулсан.

Уг үзэсгэлэнг Хойд Америкт 2008 оноос хойш барилга, барилгын материал, тоног төхөөрөмжийн чиглэлээр уламжлал болгон зохион байгуулж байгаа бөгөөд 120 мянга орчим байгууллага бүртгэлтэй байдаг юм.

Уг үзэсгэлэнгийн нээлтэнд АНУ-ын Зам тээврийн газрын дарга Ray LaHood болон АНУ-ын Худалдааны хэлтэсийн туслах нарийн бичиг Suresh Kumar болон албаны бусад хүмүүс оролцлоо.

 

 

“CONEXPO CON/AGG 2011” үзэсгэлэн яармагт тавигдсан тоног төхөөрөмж, машин механизмууд нь хүний хөдөлмөр хөнгөвчилсөн, аюулгүй ажиллагааг бүрэн хангасан орчин үеийн бүтээгдэхүүнүүд байлаа.

 

 

Үзэсгэлэн яармагт оролцсон Монголын төлөөлөгчид замын хашлага, бордюрыг янз бүрийн хэмжээтэйгээр шууд газар дээр нь хэвлэх машин, бага дунд оврын тоног төхөөрөмж, машин механизмуудыг нилээд сонирхож байсан юм.

 

 

Замын хашлага, бордюрыг янз бүрийн хэлбэр хэмжээтэй хэвлэх машин.

 

 

Үзэсгэлэн яармагын үеэр бизнес уулзалт болж МБХолбооны менежер Т.Болормаа Монголын эдийн засаг, барилгын салбарын талаархи мэдээллийг уулзалтанд оролцогчдод хүргэлээ.

 

 

Бизнес уулзалтын үеэр тоног төхөөрөмж, машин механизм нийлүүлэгчид Монголын төлөөлөгчдөд бүтээгдэхүүнийхээ саналыг маш их ирүүлж байлаа.

 

 

Уулзалтын үеэр Америк болон бусад орны төлөөлөгчид Монгол орныг нилээд сонирхож, хөрөнгө оруулалт хийх сонирхолоо илэрхийлж байлаа.

 

Дараагийн үзэсгэлэн 2014 оны 3-р сарын 18-22-ны өдрүүдэд АНУ-ын Ласвегас хотын “Las Vegas Convention Center”- т болох аж.