Барилгын салбарын өнөөгийн байдал, сайн болоод саар бүхнийг завшаан олдсон дээр нь барилгачид маань Ерөнхий сайддаа хэлж байсан юм. “Их бүтээн байгуулалт дунд хугацааны зорилтот хөтөлбөр” хэрэгжих эхлэл тавигдсан нь уналтанд ороод байсан Барилгын салбарыг хөдөлгөөнд оруулсан, их ажлын ундрага боллоо хэмээн барилгачид баяртай байгаагаа илэрхийлсэн. Гэсэн хэдий ч энэ том бүтээн байгуулалтын ажлыг дагаад үнэ хөөрөгдөл, татварын дарамт, нийгэмд тарж буй сөрөг сурталчилгаа их байгааг нуугаагүй.

 

МБҮА-ын гүйцэтгэх захирал Ц.Эрдэнэбаяр: Барилгын салбарт хэрэгжиж эхлэх гэж байгаа Их бүтээн байгуулалт дунд хугацааны зорилтот хөтөлбөрийг хэрэгжүүлэхэд зарим нэг зүйлийг тодруулах хэрэгтэй байна. Хөтөлбөрийг хэрэгжүүлэхэд үндэсний компаниудаа дэмжих, зээлийн хүүг 6% болгох боломжийг нээж өгөх хэрэгтэй байгаагаа хэллээ.

 

Харин барилгын бараа материал үйлдвэрлэлийн тухайд МБМҮХолбооны тэргүүн н.Түмэнжаргал: үндэсний үйлдвэрлэлээ дэмжих, тэр дундаа гол нэрийн бүтээгдэхүүний түүхий эдийг /тоосго, цемент/ металлаас нь салгасан байдлаар нийлүүлдэг байх хэрэгтэй. Мөн үндэсний цөөн үйлдвэрүүддээ татварын хөнгөлөлт үзүүлэхийг хүслээ.

 

МБХолбооны ерөнхийлөгч М.Батбаатар: Тендерийн асуудлыг зөв шийдэх, шудрага ил тод явуулах хэрэгтэй байна. Мөн Их бүтээн байгуулалт хөтөлбөртэй холбоотойгоор хөтөлбөрийн санхүүжилтийг тодорхой болгох, зохиомол үнэ хөөрөгдлийг барих, мөн хөтөлбөрийн хэрэгжилтийг хянах хөндлөнгийн хяналтыг бий болгох хэрэгтэй байна гэв.

 

 

Уулзалтын төгсгөлд Ерөнхий сайд хэлэхдээ: Салбарын хувьд бодлогын чанартай асуудлууд авч хэрэгжүүлж байгаа. Эдгээр бодлогын арга хэмжээндээ мэргэжилтнүүдийн санал хүсэлтийг тусгах үүднээс энэхүү уулзалтыг зохион байгуулж байгаа юм. Тэдний дуу хоолойг сонсох, бодлого шийдвэртээ тусгахын тулд энэ тусгайлсан уулзалтын зорилго оршиж байгаа юм. Дан ганц барилгын салбар гэхгүйгээр эдийн засгийн хөгжлийг илэрхийлэх хүнс хөнгөн үйдвэрийн чиглэл гээд дэд бүтцийн салбараа бодлогын чанартай тусгайлан авч үзэж байгаа. Төрийн бус байгууллага, мэргэжлийн холбоодуудын ажлын хариуцлагыг өндөржүүлэх, ажлын чанарыг дээшлүүлэх хэрэгтэй байгааг санууллаа.

 

Мөн түүнчлэн их бүтээн байгуулалтыг хийж хэрэгжүүлэхтэй холбоотойгоор төслийн эхний ээлжийн хэрэгжилтэд шаардлагатай байгаа дэд бүтцийн асуудлуудыг яаралтай шийдэхийг ажлын хэсгийнхэнд үүрэг болгосон юм.