Манай үндэсний үйлдвэр “Хөтөл цемент шохой” хувьцаат компани үйл ажиллагаагаа зогсоохоос өөр аргагүйд хүрээд байгаа гэнэ.
Тус үйлдвэрийн ажилд төмөр замын вагон, зүтгүүрийн хомсдол ихэд нөлөөлсөн байна. Энэ талаар “Хөтөл цемент шохой” компанийн Улаанбаатар дахь салбарын төлөөлөгч Г.Болдоос лавлав.

-Одоо танай үйлдвэр ямар байдалтай байна вэ? Ажиллаж байгаа юу?
-Сая хоёр гурав хоног хүчээр зогсоосон. Манай үйлдвэр гол түүхий эд болон бусад зүйлийг өөр аймгуудаас төмөр замаар тээвэрлэж авдаг. Гэтэл төмөр замын вагон, зүтгүүрийн асуудлаас болж, үйлдвэр түүхий эдээ татаж авч чадахгүйд хүрээд байна. Энэ нь өнөө зуны цементийн зах зээлийн хямралтай холбоотой. Өөрөөр хэлбэл, урд хөршөөс цемент их хэмжээгээр импортолж уг хямралаас гарна гэсэн хүмүүсийн сэтгэлгээ энд нөлөөлсөн.
        Өнөөдөр Хятадаас өдөртөө 40-50 вагон цемент тээвэрлэж байна гэж сонссон. Төмөр замын удирдлагууд хэтэрхий нэг талыг барьж, Замын-Үүдэд бүх анхаарлаа хандуулж байгааг шүүмжилмээр байна.Үүнээс болоод үндэснийх нь үйлдвэр зогсч, 800 гаруй ажилтны хувь заяаг ярих дээрээ тулж ирлээ. Мөн манай үйлдвэр уулын баяжуулах “Эрдэнэт”, Дарханы хар төмөрлөгийн үйлдвэрт шохой нийлүүлдэг. Тэгэхээр энэ хоёр үйлдвэрийн ажилд ч нэлээд саад учрах нь тодорхой гэсэн үг. Бид зүгээр суугаагүй. Асуудлаа танилцуулсан албан бичиг холбогдох газруудад хүргүүлсэн боловч вагон байхгүй гэсэн хариу өгсөн.

-Танайх ямар түүхий эд хаанаас тээвэрлэдэг юм бэ?
- Манай гол түүхий эд нүүрс. Мөн гөлтгөнө хэмээх чулууг Дорноговь, Дундговиос төмөр замаар тээвэрлэж авдаг.

-“Хөтөл цемент шохой”-н үйлдвэр дотоодын зах зээлийн хэдэн хувийг хангадаг вэ? Жилдээ хэчнээн тонн бүтээгдэхүүн үйлдвэрлэж байна вэ?
-Компанийн үйл ажиллагаа 2004 оноос сайжирч байгаа. Хоёр гурван жилийн өмнө жилдээ 60-70 мянган тонн цемент үйлдвэрлэдэг байсан бол энэ тоо өнөөдөр 150 мянгад хүрсэн. Цемент, шохойн зах зээлийн 25-30 хувийг хангадаг гэсэн судалгаа бий. Ер нь манайх төдийгүй бусад үйлдвэр компаниуд ч их хурдацтай хөгжиж байна. Гэтэл төмөр замын үйл ажиллагаа зах зээлийн энэ хурдыг дагаад улам сайжрах ёстой атал бүр л муудаад байх шиг санагдах юм.
        Уг нь төмөр замын удирдлагууд улс орны хөгжлийг урьдчилан тооцож үзээд вагон, зүтгүүрийнхээ тоог нэмэгдүүлэх, шинэчлэх ажлыг хэдэн жилийн өмнөөс дэс дараатай хийж ирэх ёстой байсан шүү дээ. Үнэнийг хэлэхэд энэ салбараас болж, үйлдвэрийн ажил цалгардаж, хүлээлт үүсээд байна. Төмөр замын хөгжлийн доройтол улс орны эдийн засагт багагүй хохирол учруулж байна шүү.